Val Badia: n melaur de èrt, cultura, paesaje e bona speisa da zacan
Se l an passà, la raida endrezèda d’uton a Persenon da l’Union di Ladins de Fascia aea abù n gran bon ejit, chest an la giornèda de cultura ladina con n bon Törggelen che à menà na trentina de fascegn a cognoscer vèlch di jormegn ladins de la Val Badia la é stata fosc amò più garatèda.
La beleza di lesc coi bie colores del uton, la descorida de testimonianzes de èrt e de cultura da anchecondì e da n’outa, la creanza e la bela maniera de la persones e no da ultim la bontà de la speisa metuda te piat à maraveà dut l grop.
L program metù ju dal president de l’Union Fernando Brunel é peà via a Pedraces, e più avisa a Ciaminades, te la majon de Lois Anvidalfarei e Roberta Dapunt. L artist e la poeta ge à avert i ujes de sie atelier al grop de fascegn, che à podù mirèr la operes fenides e entener dul l lurier e l percors che l é vindedò, da la idees e ispirazions, al studie del corp, a la realisazion tel śes per ruèr al compiment tel bron.
Chel bel lech a Ciaminades l era de la familia Anvidalfarei, che aea 8 fies, ma da canche acà 30 egn l é stat ciapà te man da Lois e Roberta, l é stat mingol desche n encanteisem bon de tramudèr na veia zuca te n londò endorà. I fascegn é resté encanté da la beleza e l valor de l’èrt e la poesia, ma ence dal azet jentil de chesta cobia che ge à avert no demò i ujes ma ence l cher, contan l percors che, do se aer cognosciù a Viena, l li à fac dezider de vegnir de retorn te la veia majon da paur, e de n fèr n lech che posse proponer, viventèr e engaissèr la cultura con evenc leterères e artistics.
L era massa pech l temp de pech più che n’ora che l era stat resservà tel program, per ruèr a veder no demò la operes metudes fora tel tobià, ma ence duta cheles (presciapech 50) che fornesc l percors artistich antornvia: al develpai de cher de dut l grop a Lois e Roberta se à jontà la emprometuda de jir n’autra outa a se empienir eies e cher de èrt e paroles.
L era ora defat de jir a La Val, avisa al Lüch de Survisc de la familia Vallazza, che à enjignà panicia, turtles, bales, liènies e cèrn de porcel con craut, per na marena con speisa da zacan de gran bontà e calità.
Domesdì con na picola raida a pe l president Fernando à menà dut l grop a veder doi testimonianzes de storia e èrt de gran valuta. La gejia de Santa Berbura, fata su del 1490 dai lurieranc te miniera, é dedichèda apontin a la sènta che vèrda via i minadores e a San Florian che stravèrda dal mèl de fech. De fora l é l bel depent a fresch del Crist su la crousc, opera de Friedrich Pacher e daite se pel veder depenc manco veies, daté del 1800: n bel celor e na ciantoria de legn tira l eie di vijitadores. Pech dalonc chel che resta de la veiora gejia de San Śenese, de chela che se troa referiment jà del 1382, ma che à conservà demò l ciampanil e n toch de mur.
L paesaje de chisc lesc, te na dì serena da d’uton e la informazions storiches e artistiches che se à podù cognoscer l é stat per duc n auter moment da recordèr de la raida de l’Union di Ladins te la Val Badia, che se à serà su con de bona castagnes enjignèdes per duc al Lüch de Survisc, olache inant che peèr via per vegnir de retorn i fascegn à podù cognoscer ence l patron de cèsa e assessor regionèl a la mendranzes linguistiches Manfred Vallazza, che ge à portà sie salut a dut l grop.
»Aon n gran patrimonie de ambient, storia, èrt e cultura vejin a cèsa – l é stat l coment di partezipanc – e no l saon nience. Per chest volon ge dir n gran develpai a l’Union di Ladins e a sie president Fernando Brunel che l endreza scomenzadives de scì gran valuta!«
Lucia Gross, La Usc 45 del 2022
