Tita Pederiva, n artist umol e sensibol
L president de l’Union di Ladins de Fascia Fernando Brunel se à cruzià del liber e de la mostra.
»L é passà 30 egn da canche l é se n jit sun Paradis nosc gran artist Tita Pederiva Batiston. No pel esser auter post per Tita, che l à vivù per duta sia vita da francescan.« L é la paroles de Fernando Brunel, president de l’Union di Ladins de Fascia, en ocajion de la inaugurazion de la mostra dedichèda a chest gran artist da Soraga (1905-1992) stata en sabeda ai 19 de november a La Gran Ciasa. L era n doer recordèr e ge dèr onor a Tita dal Sester, che à lascià na gran cantità de scultures e de dessegnes de fon valor artistich te la cèses de Fascia, e ence foravia. Se podessa beleche dir che sie gran talent no sie stat recognosciù e aprijià assà canche l era amò en vita, descheche l é sozedù per auter con n muie de artisć che é stac entenui massa tèrt. Chest fosc per sie carater umol e spèvech, tant che l à lascià lo ence bele prest l ensegnament, do che ti egn ’55/56 l aea metù su la sezion de scultura a la Scola d’Èrt de Poza, percheche l sentia de no esser portà per ensegnèr.
Fernando Brunel: man, ènema e cher de dut l projet
L merit de ge aer dat luster a Tita Batiston l é de Fernando Brunel, che l à dedicà temp e pascion, ma soraldut gran cher, a jir a enrescir testimonianzes, operes e dessegnes del artist. Scric e documenc che é stac regoec te n liber rich, che tol ite ence l catalogh de la mostra e che é stat prejentà en ocajion de sia inaugurazion. Fernando Brunel à ence domanà adimprest, regoet e metù fora te n bel alestiment na selezion de scultures e de dessegnes che n muie no aea mai vedù, te la sala de La Gran Ciasa che se à moscià ben adatèda ence per esposizions de èrt.
La operes en mostra te La Gran Ciasa de Soraga.
L’èrt e l sentiment de Tita Pederiva
A l’inaugurazion de la mostra, endrezèda col sostegn del Comun de Soraga, à tout pèrt n gran numer de jent, de parenc, amisc, artisć de Fascia, segn che Tita era benvolù ma ence per na sort de curiosità envers n artist da la gran sensibilità artistica, uzèda fora ence dal ombolt Valerio Pederiva te sie salut.
Lorenza Florian, ensegnanta de storia de l’èrt e autora del contribut tecnich sul liber, l’à rejonà de Tita desche »n artist che se taa fora n post de gran relevanza per soa originalità soraldut per le coridure de le opere de legn con chele che l ceria de ge dar zeche da nef respet a la tradizion. La novità de la mostra – à amò dit Florian – l é la sezion dedicada ai dessegnes nasciui desche studies per la preparazion de le sculture e autres ideé desche lurieres autonomes. Opere che palesa l’abilità e l natural tel dessegnar de Pederiva.«
Vèlch una de la operes metudes fora fèsc pèrt de la colezion che l artisti ge à donà al Museo Ladin, che del 1984 ge aea dedicà na mostra e n catalogh. Fabio Chiocchetti, enlouta diretor del Istitut Cultural, che à didà a meter ensema l nef liber e l’esposizion de Soraga, à recordà coche jà »enlouta l era stat na descorida cognoscer le opere e la persona umola de Tita«. Vèlch dessegn de Tita é stat durà ence per fornir l liber »Mizacole de steile« de Padre Frumenzio Ghetta vegnù fora del 1987. »Chi dessegnes no i aon più vedui – à dit Chiocchetti – no se sà olache i é. Te le fegure de le persone dessegnade da Tita vegn fora na profondità che dasc l’idea de la gran interiorità del artist. Tita Pederiva l é segur una de le fegure artistiche de Fascia che merita de vegnir recordade« l à fenì fora.
A l’inaugurazion l é stat rengrazià i enc e i privac che à emprestà la operes.
L develpai a chi che à emprestà la operes e sostegnù la scomenzadiva
L é stat te la paroles pienes de comozion de Fernando Brunel che se à entenù l leam fon che l era anter i doi artisć. »Tita l é stat mie prum maester ensema a Igi Pederiva tel ciamp de la pitura – à dit Brunel. Canche jie a la scola d’art jie bendeché te stua de Tita e l me mosciaa coche l zipiaa. Posse dir che ge vardae con amirazion, coche l luraa l legn, coche l ge dajea ju l cender e dapò soraite le cere de af, i polvres, l cobalt, i colores, per ge dar chele coridure dute particolare. Chest l era so melaur, valch da sconet, ogne outa che ge varde me peisse coche l à podù arjonjer chest resultat. Canche é tacà a enrescir sun Tita ge é domanà a Franco Degasper se l aea amò parenc e l me à contà de soa neza, Maria Vittoria che stasc vin Primier. Son jit via e ela me à avert l usc de majon e de si recorc, la me à emprestà ence n muie de opere e de dessegnes da meter fora, a ela ben segur n fort develpai.« Maria Vittoria é ruèda a Soraga e la é stata dalbon contenta de veder l gran aprijiament che ge é stat dat a sie bèrba Tita.
Ai enc che à sostegnù la scomenzadiva ge é stat sport l liber.
L develpai ge é stat sport de cher ai enc che à sostegnù la scomenzadiva: l Comun de Soraga, raprejentà dal ombolt Pederiva e l’assessora a la cultura Sandra Bussolon, l Museo Ladin de Fascia con la presidenta Lara Battisti e la responsabola Daniela Brovadan, l Comun General de Fascia col procurador Bepe Detomas e l BIM Adesc valèdes de la Veisc col president Franz Dellantonio Tasin.
Rengraziament che é jit, ensema a na copia del liber, ence a duc chi che à emprestà la operes per la mostra e al Sorastant de la Scola de Fascia Federico Corradini con l envit a portèr ence i scolees.
Amò l é stat l recort personal de Rosa Rizzi e de Bruno Fanton che à palesà la contenteza de aer cognosciù chest gran personaje: »No n é de autres che à sapù trasmeter soe emozion te n’art coscita moderna – à dit Fanton. Telpai Tita de che che tu me as dat.« L detelpai é stat uzà fora da tropes, te sie cher, tel veder l melaur de èrt e de sentiment che à lascià Tita Pederiva Batiston.
Do l moment ofizial, vidà da la giornalista e conseiera de l’Union di Ladins Lucia Gross, l é stat chel più convivial viventà da vèlch ciantia e zeche da beiver e da magnèr sporc da la sociazion.
Monica Cigolla, La Usc 46 del 2022