1985 - 30° cedean de l’Union di Ladins de Fascia
En vender ai 15 de november al teater de Sèn Jan l’é stat portà dant la comedia su trei ac “Le vintecater ore del guardia bosch Luigi Insom” de Francesco Dezulian del garber adatada da Marcelin Chicchetti del Cenchen per la filodarmatica Sen Vile de Moena.
En sabeda ai 16 de november l’é stat fat la premiazion del concors metù à jir da l’Union, per i scolees de Fascia. I cognea endrezèr ma ciantìa, na picola comedia o dut chel che i vel sul tem “I doimile egn di Ladins: storia, lengaz e tradizion”.
Da sera festa col grop de folclor de Dèlba e Penìa e la musega de “I Ladins”, duc col guant.
En domenia ai 17 de november messa grana te la Pieif de Sèn Jan, conzert de la museghes de Fascia, la festa é jita inant con descorsc de la autoritèdes, marena e dò al chino Crescenzia de Vich spetacol con cores e gropes de sonadores.
da La Usc di Ladins di 15 de november del 1985
1995 - 40° cedean Union di Ladins de Fascia
Per l’ocajion l’é stat fat trei dis de festa. Se à tacà l vender sera tel teater de Ciampedel olache l grop di “Sedimes” ensema a “La Mizacoles” i à portà dant n spetacol. La sabeda sera l’é stat fat la cena co na bona speisa da zacan alo da l’alberch Miravalle de Soraga e semper a Soraga la domenia ai 8 de november del 1995 l’é stat dit messa grana da don Giovanni Battista Chiocchetti del Batesta e dò te pluriuso se à podù scutèr doi cianties del “cor Ousc Ladine” vidà dal maester Stefano Lazzer. L’era ence desvaliva autoritèdes desche Carlo Andreotti, la presidenta de l’Union Generèla Hilda Pizzinini, l president e l president onorarie de l’Union di Ladins de Fascia Tone Polam e danilo Dezulian, Leo de Coluzi e l maester Simonin Mazza e l conseier ladin de la Provinzia de Busan Carl Willeit.
