Te ciasadafech con Stefano e Asia
Stefano Ghetta à rejonà del pan…
Te nience na dì i 18 posć a la leta per l cors Te ciasadafech i era jà dut domané. Sun Tamion al scomenz del meis de november l chef Stefano Ghetta e la conditora Asia Corradi à rencurà n cors de cojina con rezetes e consees per chel che revèrda l pan e i douces. Con te man n codejel e na biro chi che à tout pèrt à podù descorir cunsć e curiositèdes su chest mond. Che desferenza él anter na farina più forta e n’autra più debola? Co se fèjel a se fèr l levà mère te cèsa? Co se dourel la ciocolates?
Stefano l se à cruzià de moscèr coche se fèsc l pan bianch, l Laugen e chel integral, e amò vèlch autra sort. Tel auter cianton de cojina enveze Asia l’à enjignà, tolan ite i partezipanc, sacotenc douces: cookies e biscoc sèl e ciocolata, sos douces, pèstes per strudel e treces.
…enveza Asia Corradi l’à portà dant desvaliva rezetes de douces.
L cors l é stat dassen aprijià e l ultim dì, en mercol ai 9 de november, l é stat fat na viva con n picol aperitif al chef Ghetta che con dut l staff de L Chimpl l à ciapà la reconferma de la steila Michelin. La scomenzadiva é stata dassen aprijièda e la se à serà su con l’emprometuda de se troèr endodanef l an che vegn!
La Usc 47 del 2022