Uton rich per l’Union di Ladins de Fascia
L’Union di Ladins à tanche endrezà con bon ejit sia tradizionèla Festa del Rengraziament ma amò no la cognosc paussa! L é defat amò en program desvalives evenc che fèsc più rich chest uton. Vedon mingol più avisa de che che se trata.
‘fac’ 4 e 5 con Ismaele Soraperra
En vender ai 17 de november da les 17:00 te la Caserma di Studafech via Vac a Pera l é la prejentazion di numeres 4 e 5 del projet grafich ‘fac’ del joen artist da Cianacei Ismaele Soraperra, compagné dai tesć de Nicoletta Riz.
Desche te l’autra scontrèdes jà states, ence chest’outa l autor con sia realisazions grafiches se met dant de lejer i fac de nosc temp travers l eie de l’èrt, ge vardan a noscia picola realtà ma ence a chel che sozet tel mond, con chela de sporjer vèlch provocazion e momenc de reflescion e debatit.
Do l enconter l é pervedù n belot moment convivial olache duc i enter vegnui podarà cercèr de bona casta gnes e se beiver zeche en compagnia.
I recorc del ‘senator’ Davarda
Ma no la é fenida chiò! En jebia ai 23 de november l é n auter apun tament: te sala de Consei de Comun de Cianacei da les 18:00 la sociazion porta dant ‘N senator sui schi strenc’, l liber che Bepin Davarda, clas 1942 e senator de la Marcialonga, à scrit per ladin e talian contan si recorc, che passa fora beleche mez secol de storia, en cont de sia partezipazion a la gran competizion de paslonch.
Chisc recorc é jà stac publiché en pèrt ence su La Usc di Ladins tel meis de jené, en ocajion de la Marcialonga numer 50 e ades i é stac regoec duc te chesta gustegola publicazion, data fora adum col Grop Ladin da Moena desche numer spezièl de ‘Nosha Jent’.
La fegura de Ezio Anesi e la litazions del nef Consei
En domenia ai 3 de dezember l é en program n auter event de valuta: la prejentazion del liber ‘Ezio Anesi – Na vita per sia comunanza’ tel cedean di trenta egn da sia mort. Te sala de Consei de Comun de Sèn Jan a Poza defat via per l domesdì vegn endrezà na meisa torona con chela de uzèr fora la fegura de Anesi, sia vita de empegn per la comunanza, la percacenza de sia azion politica e l valor de sia ritajon per i joegn.
Ajache che chest an va fora l Consei de la sociazion, te chela ocajion vegn metù a jir ence la litazions per l renovèr, pel litèr duc i sozi en regola col paament de la quota per l an 2023.
Meteve a la leta per l nef Consei de l’Union!
L’Union envia de vif cher duc i fascegn a dèr o a renovèr sia adejion per portèr inant idees e proponetes su l’atività de la sociazion ti egn che vegn e a se meter a a leta per poder fèr pèrt del Consei, con chela de esser protagonisć atives.
Te la senta de la sociazion a Sèn Jan, Strada de Pra dal Monech 3 (sun stradon visavì l Hotel Dolomiti) podede passèr per domanèr informa zions, comunichèr voscia candidatura e paèr la quota 2023 se amò no l aede fat. Ve speton de n muie!
Cianton de l’Union, La Usc di Ladins dai 10 de november del 2023