L’Union di Ladins de Fascia ve speta

La soracuerta del nef liber dedicà a Ezio Anesi.

L ultim an l é stat pien de atività e novitèdes per l’Union di Ladins de Fascia vidèda dal president Fernando Brunel, che giusta acà n an la portèa dant na bela mostra e n liber per valorisèr la fegura del artist Tita Pederiva Batiston da Soraga. Chest’aisciuda la radunanza à aproà l nef Statut, che à mudà en pèrt ence la gestion del tesserament di sozi (che anchecondì i é zirca 300) e la formazion del Consei, e ades la sociazion se enjigna a la litazions del nef diretif e la envia duta la jent de Fascia a se arvejinèr per poder la cognoscer miec, tor pèrt a sie empegn e portèr idees e proponetes.

N an pien de scomenzadives

Del 2023 l’Union se à dat ju te desvalives setores, vardan semper de rencurèr la colaborazion con la istituzions e sociazions de val e con l’autra valèdes ladines entorn l Sela. Pean via dai più picoi l é stat enjignà e dat fora doi neva publicazions: »L picol becalegn« dedicà ai fantolins e »L manual de la 50 aventures« per i bec e joenec de la scola populères e mesènes.

Per i più gregn, en colaborazion con l’Istitut Cultural ladin, l’Union à dat fora l liber de Fabio Chiocchetti »Letres da Larcioné« e de gra a si conseieres l’à colaborà con »La Usc di Ladins« e con »Nosha Jent«, l boletin che vegn fora 4 outes al an enjignà dal Grop Ladin da Moena, che l’à giusta festejà i 60 egn de vita. Te chesta ocajion l é stat realisà ence l numer spezial »N senator sui schi strenc«, recorc de la 42 Marcialonghes de Bepin Davarda, prejentà chisc dis passé en colaborazion con la Biblioteca de Cianacei. Semper de chisc dis l é l laboratorie per fèr la corones de avent metù a jir ta Penìa, e i neves apuntamenc di projec »fac« e »Saeres« che podede veder sun chesta piata.

No l é mencià la prejenza a do a do sui social (te chest moment l calandèr del Avent), i momenc dediché a la musega, con la »Ladiniatour« a la fin de setember e i bie conzerc che à avert la festa del Grop da Moena e la Festa del Rengraziament a Cianacei.

L Rengraziament, con la bela messa ladina e la recordanza te Cèsa de Comun, é stat dedicà chest an a Ezio Anesi, se n jit acà 30 egn. Per chesta ocajion l’Union di Ladins, con sia conseiera Lucia Gross, l’à metù ensema n liber de 240 piates per fèr memoria de chi egn e de dut chel che Anesi à fat, scrit e dat per sia comunanza. La publicazion vegn prejentèda te sala del Consei de Comun de Sèn Jan en domenia ai 3 de dezember da les 4 domesdì, con na meisa torona per descorer de l’arpejon che l prum conseier e senator fascian ge à lascià a noscia comunanza e de coche se pel la portèr inant.

Scriveve ite a la sociazion ladina

Apontin te chesta ocajion ai 3 de dezember l’Union di Ladins de Fascia averjarà ence la litazions per l nef Consei. Duc é envié a vegnir jà chisc dis te la senta de l’Union di Ladins a Sèn Jan per fèr o renovèr sie tesserament. A chesta vida se pel palesèr l sostegn a l’atività de la sociazion, aer en don o con de bie rebasc la publicazions de l’Union e ence litèr e se candidèr per fèr pèrt del nef Consei.

L é emportant l contribut de duc, acioche la sociazion ladina storica, che del 2025 la compirà 70 egn, posse seghitèr a crescer e col dida- ment de duc a troèr fora e portèr inant scomenzadives per tegnir vives l lengaz, la storia, la cultura, l’identità e la tradizions ladines. Se pel aer ogne autra informazion tel ofize de l’Union di Ladins a Sèn Jan, sun stradon visavì al Hotel Dolomiti, ence per telefon al 0462 764545.

da La Usc di Ladins 46 del 2023