L é sun desch fac 4
L’à per titol ‘America’ la quarta opera artistica del joen Ismaele Soraperra che fèsc pèrt del projet ‘fac’ de l’Union di Ladins de Fascia che ne sporc ogne doi meisc vèlch stimol de reflescion pean via apontin dai fac sozedui te noscia valèdes e tel mond.
L curt scrit de Nicoletta Riz che compagna l’opera ne met dant chest’outa na lingia de domanes per ne fèr pissèr sora ai fac che à caraterisà i meisc de messèl e aost del 2023, i fac sozedui tel mond, en particolèr te l’America, ma che condizionea ence nosc stil de vita, nesc pensieres e noscia vijion. N Stat pelel vietèr guanc te la scoles, pelel zensurèr n film? Pelel n imprenditor mudèr inom de na azienda, controlèr la libertà de esprescion? Pelela na persona serèda via esser stata una de la icones del goern mondièl? L artist, tras i simboi dessegné sun sia quarta stampa grafichartistica, ne envia a na reflescion fona sun chel che ne sozede dintornvia, che ne tocia ence nos, che caraterisea nosc viver da duc i dis, che zenza l voler muda nesc pensieres, nosc esser, nosc prejent e nosc davegnir.
L’Union di Ladins con chesta operes artistiches e i scric japede la vel envièr via la discuscion, la vel creèr momenc de baratament de idees e opinions, la vel ge dèr l met a doi joegn de palesèr sia vijion per esser da stimol e da confront con la vijion di etres.
La quarta opera artistica de Ismaele Soraperra vegnarà prejentèda via per l uton, bonamenter con la numer 5, ensema al artist che didarà a viventèr la discuscion.
Endèna chi che volessa aer chesta neva opera grafica pel vegnir a se la tor te senta de l’Union di Ladins a Sèn Jan. (Monica Cigolla, La Usc di Ladins 38 del 2023)