Gran atività per l’Union di Ladins
L an 2022 l é stat dalbon rich de empegnes per la sociazion che da beleche 70 egn se cruzia de stravardèr e viventèr la cultura ladina e l é tacà via a dut ciodo.
Jà ai 9 de jené ensema col Grop Ladin da Moena l é stat endrezà te gejia de Sèn Vile la pruma prejentazion del liber »I colores del temp« de don Bruno Daprà. La poejies del preve moenat, rencurèdes da Fabio Chiocchetti, é state dapò prejentèdes ence a Pera, olache l autor à ret la parochia per n muie de egn, e a Cianacei.
En vea de Sènt Antone l é vegnù fora l prum de na lingia de filmac rencuré da Nicoletta Riz e Nives Iori che ne à compagnà fora per l an per recordèr na persona che à metù a salvament l cher de noscia usanzes e tradizions: Simon de Giulio, ajache del 2022 l é stat l 35° cedean de sia mort (ai 5 de firé del 1987 e i 110 egn da canche l era nasciù ai 12 de dezember del 1912.
Ai 10 de firé l é stat n auter cedean emportant per la cultura ladina: chel dì del 1982 moria l Tinoto Monech (Valentino Dellantonio) e l’Union col Grop Ladin, à fat la riedizion del liber »Dò l troi de la speranza« e l à enjignà la registrazion de duta la poejies e n segnaliber con QRcode per poder les scutèr. Ence i studenc di licees de Fascia à podù cognoscer la fegura e la poetica del Tinoto Monech te na scontrèda con Fabio Chiocchetti.
Ai 13 de mèrz a Sèn Jan l é stat la radunanza generèla olache l é stat prejentà numer 10 del Almanach, la publicazion che la sociazion ge sporjea ai sozi e ai aboné de La Usc. Chiò l é stat anunzià che chest l era l ultim numer de la publicazion viventèda dai dessegnes de Manuel Riz, ajache l artist fascian à conscidrà che do 10 egn se à serà n zicle e l é miec lascèr su.
Ai 4 de mé, en ocajion de l’Aisciuda Ladina l é stat prejentà na publicazion che à abù dassen gran ejit: l liber »Fascegn. Retrac de jent da zacan«, volù dal president Fernando Brunel e rencurà da Nicoletta Riz, che tol ite passa 250 retrac veies, cernui fora dal archivie metù ensema ti egn da la redazion fascèna de La Usc di Ladins per la rubrica »Chi él pa?«.
Ai 8 e 9 de messèl l’Union à endrezà na raida storich-culturèla con n bel grop de fascegn per jir a veder la stua di pitores fascegn te la Krimmler Tauernhaus te l’Achental (Austria). Te chesta ocajiion l é stat portà a compiment n projet che l president Brunel aea portà inant adum con Franz Tasin: n nef depent a memoria de nesc giaves, fat da Brunel sun n tulin de la veia stua, che é stat inaugurà chi dis te n moment ofizial.
Dai 12 ai 16 de setember, ensema con la Scola de Fascia e l Comun de Sèn Jan e col sostegn de autra istituzions, l é stat endrezà l 5° Simposie Toni Gross, a 10 egn da la pruma edizion, con la neva direzion artistica de Pierangelo Giacomuzzi. Chesta edizion à metù adum scultura e musega a na vida sperimentèla e inovativa.
Ai 23 de otober l é stat la tradizionèla Festa del Rengraziament, che la sociazion ge à dedicà chest an al Socors da Mont de Fascia con duc si volontadives. Do la bela messa ladina ofizièda a Ciampedel da don Mario Bravin, a vigniuna de la 3 stazions de la Val de sora, Val de sot e Moena ge é stat donà na statua de Sènt’Ugèna con vindò l mont simbol de si paijes, zipièda da Paolo Costazza.
Apede a desvalives autres corsc de cojina, pitura, corones de avent e auter, ai video tutorial »Saeres« vegnui fora via per l an e ai 4 numeres de Nosha Jent che vegn metui adum dal Grop Ladin, l’ultima gran scomenzadiva l é stat la mostra e l liber su Tita Pederiva Batiston. Per i 30 egn da la mort del artist da Soraga (1905-1992) l president Fernando Brunel à volù endrezèr na bela esposizion de sia operes, metudes fora te La Gran Ciasa dai 19 de november ai 4 de dezember co la colaborazion del Comun de Soraga, e l’Union à enjignà e dat fora ence n liber che met al luster la fegura de Tita Pederiva desche artist e desche om.
La Usc di Ladins 01 del 2023
L melaur del Canori
Ai 3 de oril te teater del oratorie de Moena pien de jent vegn prejentà l liber »Canori. Scric, poesìe e cianzon« dat fora adum da l’Union di Ladins/Grop ladin da Moena e dal Istitut Cultural Ladin. L liber, rencurà te egn de lurier da Fabio Chiocchetti del Goti col didament prezious del nez del Canori e archivist al MART Federico Zanoner, l regoi l patrimonie del autor moenat e l ge dèsc luster al melaur che ne à lascià Ermanno Zanoner del Gabana (1907-1991) personaje ecletich de gran valuta desche fontèna de èrt, letradura e cultura a 360°.