Te ciasadafech: n cors per emparèr a cojinèr i crauc

Ensema al chef Armando Nicolussi al Hotel La Grotta.

Tel chèder de la scomenzadives leèdes ai tutorials Saeres l é stat endrezà fora per l meis de mé cater apuntamenc dal inom ‘Te ciasadafech’ en colaborazion con la sociazion Cheghes de Fascia. Na dejina de partezipanc à podù descorir cater rezetes desvalives per valorisèr e cojinèr i crauc.

Perché pa i crauc?

D’uton del an passà l é stat endrezà ensema a Dora Tamion de Bascian e la familia Ghetta de Martin n tutorial de Saeres, olache se rejona bel avisa de coche se fèsc a fèr ite i crauc aldò de la tradizion. Te tinac i capusc i boi ensema ai saores e chel che vegn fora l é n bon prodot da poder tegnir su per mingol de temp, da poder durèr te cojina e che fèsc ben al corp. De chest se rejona belapontin tel vademecum stampà fora da troèr te senta o da desćiarièr dal sit de la sociazion. Ence chest filmat l é stat metù adum da Filmart Television col sostegn economich del Comun General de Fascia sul Pian de politica linguistica e l é da troèr sul canal Youtube de TV Ladins.

Te cojina de la Maison Fredarola con Cristopher Verra.

L cors

La pruma scontrèda se à dejout en lunesc ai 9 de mé te cojina del Hotel La Grotta sa Vich, olache l chef Armando Nicolussi ge à ensegnà ai partezipanc a enjignèr n tortin de crauc con sos de Spretz Tzaorì, con apede n crocant de farina de formenton e ardel brostolà. Te chesta ocajion l é stat rejonà de farines e de coche se doura la maizena.

Tel secont apuntament de en lunesc ai 16 ta Ciamp Trujan aló da la Maison Fredarola dessema col jon chef Cristopher Verra se à cojinà de bogn refiei da craut, con spareribs e pomidores. Te chest cajo, enveze, un di argomenc de aprofondiment l é stat la cèrn e coche se fèsc a tratèr l gras.

Ja Soraga al Hotel Latemar l apuntament con Michele Petrone.

Dapò se é jic ja Soraga con n dopie apuntament: en jebia ai 19 de mé col joen Michele Petrone al Hotel Latemar per fèr n piat modern, platten con crauc e salsa aioli, e en vender do, ai 27 de mé, con la chef Elena Vian al Hotel Miravalle (ela la rencura sun chest sfoi la rubrica ‘Zeche da bon’). Con ela l é stat cojinà cajoncie da craut, na magnadiva da zacan, ampò con n ripien che no se troa tant da spes te noscia tradizion.

Bensegur duta canta la rezetes les é ‘da restorant’, piac fornii e studié fora da esperc del setor, pissé per jent che à piajer de magnèr delvers e de tastèr saores desferenc. Ampò, l é stat l’ocajion per rejonèr de ingredienc da vignidì, entener co poder durèr a la mior vida farines e sosc, picoi e curiousc truchec per se empraveler di forgn.

Con Elena Vian al Hotel Miravalle, semper ja Soraga.

Te cater scontrèdes se à dapò rejonà de gust, se se à confrontà e se à spartì de bie momenc. L é stat enteressant osservèr profescionisć te sie lurier, descorir chel che stèsc vindedò l endrez de n piat e cognoscer desferenc stii, o miec filosofies, te ciasadafech.

A duc i chef che ne à didà te chest percors e a la sociazion Cheghes de Fascia n fort rengraziament de cher… e no se sà mai, fosc se vedaron da nef a n auter apuntament chest uton!

Nicoletta Riz