Amò scric e poesìes del Canori en audio
Dò i prumes audio porté dant en ocajion de la prejentazion di scric de Luigi Canori, ades l’é online ence na seconda lingia de registrazions olache se pel scutèr sia ousc, touta sù di egn ’60, canche l’Autor enstess lejea si tesć per i programes ladins de la RAI de Busan te la rubrica ‘Dai Crepes dl Sela’. Se trata dant da dut de cianties, valguna muie cognosciudes desche ‘A Sèn Vile’, autra manco: aboncont apede ai tesć chiò se pel scutèr sù ence de bela prejentazions che despiega delvers l contegnù e l’ispirazion de l’opera.
‘Ciadina’, depent de Veronica Zanoner Piccoliori, dal liber ‘Leggende e racconti delle Dolomiti’ (1982)
De chela manco cognosciudes, desche ‘Ciadina’ e ‘Le doi cascade’, se pel sentir ence la esecuzion musicala portèda dant acà temp da ‘i Marascogn’, coscita da aprijièr amò de più l valor de chesta compojizions. ‘Ciadina’, per ejempie, la é ispirèda a na contìa binèda sù da Karl Felix Wolff che rejona di prumes tempes, canche ite per la mont de Aloch l’era na comunanza de pèstres e verieres che cognea se bater dassen contra i Trujegn invajores, e l’é interessant veder coche l Canori à sapù ‘dramatisèr’ chest fat te na sòrt de dialogh anter la prinzessa e l verier, sostegnù da na musega da la saor arcaica e straneousa.
Ence i etres audio cernui fora te chesta ocajion porta dant scric pech cognosciui, soraldut poesìes de carater epigramatich, che tol ispirazion da fac de la vita da duc i dis, magari sozedui tel temp passà, o adertura touc dal Vangele, desche ‘El fiöl lengera’ (per talian: ‘La parabola del Figliuol prodigo’). Poesìes scrites en ‘endecasillabi’, o versc da undesc colpes, descheche dijea l Canori, fora che ‘La più gran pièa’, una de chele ‘scuriade ferse’ (a n dir del Simonin Tonolerchie) ti confronc de «sta nosha sozietà», olache perpeea (amò anchecondì!) «sta gran pièa / che l’à inòm ipocrijìa»: emben chesta la é scrita en campec de otonaries, na metrica che ge dèsc a la composizion n ritm grotesch n muie adatà a la critica sozièla. Scutavela delvers, magari col test sot man, e dapodò dijé voetres se no l’é vera. E a la fin magari fajé cont de sentir nosc Autor che manaman serèa sù sia trasmiscions dijan: «Stajonse ben e fajon i valenc!» FCh