La storia certa de n retrat

Che àlo po de cert chel retrat fat dal fotograf Francesco March da Ciavales tel dì del maridò de so amich Valentino Jellici, per chi da Moena Tinoto Garber? L era ai 22 de november del 1910 e l Tinoto se maridava con la Rina dal Forn, 6 egn dapò de esser restà vedof con 7 fiöi per la mort de sova amada Margeta del Menegon.

Giorgio Jellici del Garber (clas 1935) a ge vardar a chest retrat, che int per i egn ’60 ge era stat dat ensema con tropes autres da sova ameda Valeria, che la tegniva su e la ge contava al nevó le storie de ciasa, l à scomenzà a pensar, a proar de entener chel che l era de cert che no l era bon de entivar.  

La soracuerta del nef numer spezial de Nosha Jent.

E a la fin l à ben entenù che che l era de cert: beleche na sort de ‘śal’ te la storia de familia... ma noi chigiò no ve dijon nia de auter, percheche no se pol paner dut cant (o ‘spoilerar’, còme che i disc ancöndì).

L aeva scrit duta la storia, l Giorgio Jellici, jai egn te n liber dal titol ‘Nove Racconti. Trentino e oltre’, dat fora dal editor Stella de Rorei del 2007, e chest an l se à empensà de n trar fora na contia mingol più curta e de ge la sporjer a la jent de so paes travers l Grop Ladin da Moena.

Chesta contia de n fat sozedù dalbon, scrita ence per moenat de grazia al bel laor de traduzion fat dal Marcelin del Cenchen, che l la fasc sentir amò più sćiantiva e de ciasa, l é deventà n bel numer spezial de Nosha Jent, per ladin e per talian, rencurà dal Fabio del Goti e con anterint ence valch bel retrat. LG