Ma chel bel che l é fèr la Corona de Avent! – 2^ edizion
L é da stat dassen bel se troèr endodanef ta la veia scoles de Penìa per enjignèr da nef duc chenc ensema la Corona de Avent. Estra che n tous, na chindejina de femenes de ogne età les à podù fèr jir la mans (ma soraldut la fantajia) per embastir la Corona de Avent che la les compagnarà fin da Nadèl.
La Corones enjignèdes col didament de Teresa Dantone
Sun desch te mez a la sala l é stat enjignà vetes de ogne color e mesura, picola balotes lumenouses, fornimenc de legn e segur bie sgalizenc e amò apede piotoles sbichèdes de arjent e or.
Teresa de la Lis dal Vera la śirèa entorn sala per moscèr co fissèr ben delvers la dasces a la Corona, la decorèr con fioches e autra fornimenta che passenee l’una con l’autra. Ampò tel laboratorie no l é stat fat demò Corones de Avent, ma ge é stat lascià lèrga ence a la letradura ladina: Loreta Florian, per cont di Servijes linguistics del Comun General de Fascia, l’à dit su con gran emozion la poejia »O mia bela Sènt’Uiana« e tinultima l’à let »La contìa de Nadal« de Renata Iori da Poza (da la revista »Na contìa per Nadèl«, 2010, CGF, consegnà en don ai partezipanc).
Con la musega di Pazedins l domesdì l é stat amò più algegher e no podaane che fenir chest moment en compagnia con zeche de bon e l vin ciaut enjignà da Paul de Pilon. Rengrazion duc chi che ne à dat na man, chi che à viventà l domesdì e l Comun de Cianacei per ne aer lascià a la leta la sala.
La Usc 47 del 2022