Simon. Inché desche ingern

Simone Soraperra, da duc cognosciù desche Simon de Giulio.

Gé cree che na bona pèrt di fascegn abie amò sentù rejonèr de Simon de Giulio. L sauta fora tras e mingol dut entorn cò se aur n liber de scola per ladin, cò se se embat te n proverbie, na contia, na usanza, na mascherèda; sie inom ciuta fora do e do.

Ma chi él Simon de Giulio?

Simon de Giulio l é la persona che, ensema a n picol grum de autres, à metù a salvament l cher de noscia usanzes e tradizions (che apontin l é ence l titol de sie liber), che fossa la vita da vigni dì, sajon per sajon, de nesc crosaves, chela che el l sentia franch che era jà mingol morta fora e che bele prest l progres e la modernità, che vegnia inant a speron, aessa scoà demez sche deldut.

Gé me l fegure sentà ju apede desch, co na biro te man o co la machina da scriver, che l vardèa fora per fonestra e l jia endò col pensier a chi egn, a coche la jent vivea, ai fac sozedui, vivui en pruma persona o sentui contèr da zachei de etres; me l fegure vardèr e osservèr i pré e la vères nossetes e recordèr canche l era prest dut n ciamp; me l peisse ence levèr i eies en aut, a la monts e ai bosć, e recordèr canche les era viventèdes te ogne cianton da jent e bestiam per fèr con fegn e jir a past, jir a legna e a ciacia; me l fegure ence con pensier avert e oreia fina jir stroz per Penia, Dèlba e Cianacei e ence più en ju, a scutèr e domanèr fora chi che amò saea da chi egn e se notèr su chela paroles e chi lurgeres che era per jir ju, chela conties e chela patofies che pec amò recordèa, e dapò les meter ju ence percheche les vegnisse publichèdes su la Ousc de Fascia (o La Veisc) o per les dir fora a la radio.

Coscita l à binà ensema piates e piates de vita fascèna. Ma no pa demò, vé! Simon metea ju ence poejies e mascherèdes pissèdes fora enstes, e l se cruzièa de scriver articoi de cronaca locala; donca apede al regoer chel che l é stat, l à ence jontà zeche da nef, te sia bela schertura neta, te sie bel e biot fascian.

Purenta pascion. Chest me vegn tel cef canche peisse a Simon. N tèl lurier no l pel che esser spent da la biota pascion per sie lengaz e sia cultura.

Simon de Giulio.

Chest an apontin l é 110 egn da canche, ai 12 de dezember del 1912 da les 12 (o amancol coscita contèa el), l é nasciù e 35 egn da canche l é mort, ai 5 de firé del 1987. Per chest co l’Union di Ladins se aon pissà che fossa bel e giust fèr zeche en sia recordanza, e belimpont l é nasciù l projet Simon. Ingern desche inché. L se trata de 12 video che vegnarà fora ogne meis e che ne contarà di desvalives aspec de la vita de Simon de Giulio.

L zil l é chel de fèr cognoscer a la jent no demò che che l à fat, ma ence apontin chi che l era Simon de Giulio, sia persona.

A ogne bon cont la scomenzadives en sia recordanza no les fenesc chiò, ma endèna no dijon nia de auter... ve lascion col prum filmat vegnù fora en la vea de Sènt Antone, lo che Paul Verra de Pilon ne conta mingol de la Mèscres, autra gran pascion de Simon.

Con chesta vertola, chest an che endò, cauja Covid, no se pel viver Carnascèr aldò de la tradizion, aon ence desleà Carnascèr, amò n’outa ensema a Simon.

In la vea de Sènt Antone

i desleèa Carnascèr

co na ferchia da scassèr

de ciampaneles e bronsins.

Nives Iori