N liber che dèsc speranza
No podea esser cianties più beles per averjer en domenia ai 16 de jené la prejentazion a Pera del liber »I colores del temp« de don Bruno Daprà.
La soracuerta del liber.
L quartet »Demò ousc« ge à sport con gran braura a la jent ruèda te gejia a scutèr l preve che aea ret la parochia per 17 egn, »La Madonina del Vaiolet« e »Sajons«, toc che passenea patoch con doi di temes che caraterisea i scric publiché da don Bruno: la fe, la speranza e la beleza che aon entorn, e l jir del temp, con duc si momenc bie e manco bie, si colores lumenousc o ence mingol più scures, ma vardan de uzèr fora semper la positività.
Te la scontrèda, averta da Cesare Bernard, don Bruno, compagnà da Fabio Chiocchetti che à rencurà la edizion, l à rejonà de sie scriver, de la marevea che caraterisea i pensieres, i recorc e la reflescions, nasciudes ence tel cors di egn passé a Pera: scric che se lascia lejer sorì e che dèsc speranza.
L publich à aprijià dalbon n muie la prejentazion, tant la cianties che la paroles de don Bruno e la letura de vèlch un di scric, tant per ladin che per talian, che se troa sul liber dat fora da l’Union di Ladins de Fascia col Grop Ladin da Moena.
Don Bruno Daprà e l quartet »Demò Ousc« te gejia de Pera.
L é n liber che enlumenea i cheres te chisc tempes scures, e che do la prejentazion stata a Moena (de chest aon scrit su La Usc nr 2 de chest an) e a Pera, l vegnarà portà dant a duta la jent ence a Cianacei, te na scontrèda metuda a jir te sala del Consei de Comun en colaborazion con la Biblioteca en jebia ai 3 de firé da les 16.30, viventèda da la cianties portèdes dant da la sopran Angela Chiocchetti col compagnament al piano del maester Paolo Bernard.
Te chesta ocajion l liber vegnarà dat fora a n priesc rebassà e duc é envié de cher a tor pèrt. LG