N segnaliber per l Tinoto
L era ai 10 de firé del 1982 canche Moena e Fascia perdea na fegura de gran valuta per sia cultura ma ence per l’economia e l svilup de la comunanza, l Tinoto Monech.
Valentino dell’Antonio, chest sie inom sui documenc, é nasciù ai 8 de otober del 1909 a Moena. L studia al liceo a Trent, dapò l va ence a la scola alberghiera a Maran. Dal 1933 l scomenza la cariera de funzionarie e dirigent de banca a Moena. Te sia vita l à tras conjobià l empegn prezis tel lurier de dirigent de banca a chel creatif de poet, »zinghen dei sognes« descheche l se dijea el enstes. Sia liriches fones e delicates, no semper sorides da entener, che ne porta dant sia vijion auta e tragica del om, de la vita e del destin, é states publichèdes per egn sun »Nosha Jent« e dapò regoetes do sia mort tel liber »Dò l troi de la speranza«.
Chest liber che era stat dat fora da la Cassa Rurala de Moena del 1982, oramai no l era più da troèr, e per chest jà l an passà l’Union di Ladins e l Grop Ladin da Moena, semper en coedizion con la Cassa Rurala, à enjignà na neva edizion smaorèda de la publicazion.
L liber e l segnaliber con la poejies del Tinoto Monech.
La poejies del Tinoto Monech no à perdù tel temp nience n fregol de sia beleza e atualità, ajache les rejona di sentimenc più fogn de l’ènema e di misteres de la vita. Les é states letes, studièdes e autores da chiò e da foradecà à scrit lassora piates de critica leterèra de gran valuta.
L ultim vèrech pissà per l cedean l é stat de enjignèr n belot segnaliber, con n QRcode da olache se pel jir a se scutèr la registrazion de duta la poejies che l é tel liber, a na vida che posse doventèr na sort de audioliber che, anter ousc e scrit, permete de entener e aprijièr duta la valuta de chest gran poet che vegn de spes paragonà al Leopardi.
Liber e segnaliber i é a la leta te la senta de l’Union di Ladins de Fascia a Sèn Jan, e via per l meis de mèrz i ge vegnarà sporc ai studenc di ultimes doi egn de duc trei i licees de Fascia en ocajion de na scontrèda te chela che l dr Fabio Chiocchetti ge prejentarà la fegura e la poetica de Valentino dell’Antonio ai studenc, en pèrt en prejenza te sorastanza e en pèrt coleé te na sala virtuala aldò di protocoi anti Covid.
Lucia Gross