»Saeres. Tutorials de tradizions e mestieres fascegn«
Chest uton noscia sociazion dèsc fora adertura 3 neves filmac de Saeres, n projet de tutorial etnografics peà via acà 2 egn d’istà. Sui social, sul canal youtube de TV Ladina e sui maxischermes de noscia piazes vegn metù fora chisc curc filmac che documentea mestieres e tradizions de noscia val, realisé ensema con jent de Fascia. Vedon i ultimes argomenc che ve portaron dant!
Angela del Goti ne ensegna coche se cojina la supa da craut.
La supa da craut
Chest filmat, dat fora ai 10 de november, l é l prum de noscia lingia de tutorial che rua ja Moena. Angela Chiocchetti del Goti, presidenta del Grop Ladin da Moena ma ence super coga, la moscia e la conta coche se fèsc chesta supa aldò de coche l’aea emparà a la fèr te cèsa sia.
L é n magnèr dalbon cognosciù te Moena e Soraga (lo che l é cognosciù desche ‘strefion’), che zacan vegnia enjignà soraldut fora per l uton, canche l era l temp de fèr ite craut. La supa da craut deida a neteèr fora l corp e se la magna con panec de sièla.
Jièr a iassen
En mercol che vegn, sul canal de TV Ladina, prejenton l nef tutorial de Saeres sul iassen. Dintorn desch, che jia a chèrtes, l é Rosanna, Olivo e Fernanda de Tita de Tone e Silvana de Cicia da Dèlba: vidé da la ousc de Fernanda, podarede emparèr coche se jia, coche se dombra i ponts e colugn che l é i segnes sconec anter jiadores. Te n auter curt filmat che metaron su facebook ve mosciaron ence coche se segnèa i ponts enlouta. L iassen vegnia jià soraldut te la Svizra, olache i ge disc Jass: fazile, desche de etres jeghes che aon troà fora de gra a nesc informadores, l é stat portà te Fascia da fascegn che jia a lurèr al Lont. N é sacotenc, se n aon fat dalbon na gran marevea! Tel temp fossa da i tor su e i documentèr duc: crìtisc, snòps, batn, spil e giaich, mao mao, e amò de etres. Apede a chisc aon troà fora ence n jech particolèr, l pafranzen: somea che sie stat n jech con la moneides, zachei sèl amò coche se jièa?
Chest tutorial, tout su chest’aisciuda lo dal Bar Diga sun Fedaa (rengrazion Valentino Baroni per sia disponibilità), l dajon fora en mercol ai 29 de november da les 17.
Silvia de Ida de Margheri endèna che la fèsc ciauza.
Fèr ciauza
Fenion chest uton de apuntaments de Saeres con n filmat che moscia coche se fèsc ciauza. Silvia Rasom de Ida de Margheri da Ciampedel la ne ensegna n fèr n scufon de lèna, da la giama e l fondel, al ciucegn e la ponta. L vegn fora belapontin al scomenz del invern, canche domesdì via zacan se stajea te cèsa, bel al ciaut. La femenes fajea ciauza e proprio Silvia ne à contà che sia mère ge enjignèa i scufons a duc sie frèdes e sores. La ne à dit ence che enlouta, per sparagnèr, la soleta del scufon vegnia fata te na vida desvaliva, con na sort de cojidura dintornvia lordelpe,coscitaselasefièase podea la mudèr fora. L é da dir che l é desvaliva vides per fèr ciauza, nos ve n moscion una: aede voa de emparèr?
Chisc l é i trei apuntaments de chest uton, ma n aon jà te crigna de etres e tanta idees per neves Saeres! Ren- grazion desche zenza Dolomiti Media House, che ne met adum chisc filmac con gran braura e calità, l Comun General de Fascia per l sostegn economich ma soraldut duta la jent che se met a la leta per ne moscèr e ne contèr, e ne consea argomenc da enrescir. E se aede ence vo vèlch consei, podede contatèr nosc ofize o la responsaboles del projet Nives Iori o Nicoletta Riz.
da La Usc di Ladins 46 del 2023