I ‘fac’ del mond engaissa l debatit

Ismaele Soraperra endèna che l firma sia operes.

Na chindejina de persones à tout pèrt en vender ai 17 de november a la quarta scontrèda endrezèda da l’Union di Ladins per prejentèr i doi ultimes projec grafics de Ismaele Soraperra: ‘fac’ numer 4 e 5 che tol ite i meisc che va da messèl a otober.

Chest’outa la jent se à troà te Caserma de Poza via Vac, de gra ai Studafech che à metù a la leta la gran sala, e l é stat n bel moment informal e de confront su la doi ultima neva operes del artist da Gries. Chela che regoi i fac sozedui via per i meisc de messèl e aost, che no era più stata prejentèda ajache l lurier te sajon no aea permetù de se troèr, l’à per titol ‘america’ e chela che revèrda i meisc de setember e otober l’à desche titol ‘sènta’.

Do l salut del president de l’Union di Ladins Fernando Brunel, la vizepresidenta Nicoletta Riz, che l é ence l’autora di scric che compagna la operes, à metù dant i criteries e i obietives de si comenc a la grafiches. L é stat dapò l autor medemo che à spiegà sia operes che se lea ai fac sozedui chisc meisc passé te Fascia e foravia: anter i etres l é i 140 miliarc de dolares spenui per i combustiboi fossii, l zero termich che rua ai 5000 metres, l film de Barbie che à abù tant suzes te vèlch Paìsc e che te vèlch auter l é stat descomanà, ma ence la vera anter Palestina e Israel, chela anter Ucraina e Ruscia, l missil nuclear Burevestnik, la Franzia che descomana i simboi religiousc te la scoles, noscia tera che seghita a padir.

La jent che à tout pèrt al moment de confront endrezà da l’Union di Ladins de Fascia te.la caserma di Studafech de Poza e Pera via Vac.

L debatit é doventà più gaert canche l é stat tocià l tem de la religion e de la spiritualità. Ismaele Soraperra à dit che »per mie cont i simboi religiousc no cogn vegnir metui fora ti lesc publics« fajan referiment al Crist tacà su te caserma anter i trofees, »n lech publich cogn restèr neutrèl«.

I partezipanc à descoret al lonch sul valor di simboi religiousc, sun coche enveze che i tor ju se podessa ge n jontèr apede de etres per respet de duta la religions, e che no l é pa semper vera che la veres vegn envièdes via per costions religiouses. L é stat rejonà de inclujion e de globalisazion, de libertà e de oprescion, e ogneun à palesà sie pont de veduda te n confront avert olache nesciugn giudica. Fossa zenz’auter bel che a chisc momenc tole pèrt più joegn per aer n baratò de idees e ponc de veduda anter generazions desvalives.

Ogne partezipant à ciapà na copia de l’opera grafica numerèda e firmèda dal autor e duc ensema se à passà amò n bel moment convivial con castagnes, chetes da Ivan Pezzei de Mongo, e n bon bicer de most. A duc chi che à didà n bel develpai e per duc l apuntament l é de jené con l’ultima opera grafica artistica de Ismaele Soraperra.

MCI, da La Usc di Ladins 46 del 2023