Èrt e scienza se conjobia tel »Vöit«
L’èrt, che dal 2012 viventea l zenter de Poza vigni doi egn per l simposie de scultura tel legn dedicà a Toni Gross, artist e rampeador stat dozent e diretor de la Scola d’èrt de Fascia, se conjobia con la scienza te chesta 6^ edizion del event metù a jir vigni doi egn da l’Union di Ladins de Fascia adum col Comun de Sèn Jan e la Scola de Fascia.
Chest’outa l tem, cernù dal diretor artistich Pierangelo Giacomuzzi, l é »vöit«, na bela parola moenata che vegnarà interpretèda dai artisć che dai 16 ai 20 de setember lurarà te la postazions enjignèdes anter Piaz de Comun, Piaz del Malghèr e Strada de Meida. Ogne artist o grop de artisć arà a la leta na bora, no na bora ‘classica’, ma na bora veta, n ‘cianon’, coche ge vegn dit per ladin, de chi che vegn dai èlbres batui ju, sbetèda del legn daite e l cognarà ge dèr esprescion travers chesta bora veta a sia idea de vet.
Apede ai artisć, a se sproèr a chierir fora i aspec desvalives che pel aer l conzet de vet sarà ence n grop de studenc del Liceo artistich con si dozenc e amò esperc de desvalives setores sporjarà input enteressanc sul tem cernù per viventèr la creatività.
I artisć partezipanc
Su la 6 postazions enjignèdes lurarà per duc i dis del simposie 8 artisć: 4 singoi e 2 a cobies. La jent podarà ruèr apede, veder i progresc del lurier portà inant e i domanèr fora per entener miec sia idea.
Per Angelica Stimpfl, creativa spezialisèda te stampa e grafica artejanèla e te la comunicazion, l vöit l é na cuna per l anteveder.
Per cont de Francesco Gibaldi, polistrumentist e inventor musical, l ‘vöit’, l é paussa o acort indispensabol te la musega, ma ence element essenzial daperdut, te vigni sort de composizion.
Irene Trotter, pitora e artista visuala, vel enveze ge dèr esprescion al ‘vöit’ vedù desche sens psicologich de no esser aldò, de se sentir dejutoi.
Peter KOMPRIPIOTR Holzknecht, artista del son e de sia mencianza, disc che l vet l é a la basa de dut.
I pitores e artisć visuai Lara Braconi e Gianmaria Brizzi i lurarà adum per ge dèr esprescion al vet desche entità che doventa lech percacent, refuge olache pel se pascentèr la cultura.
En ultima Flavia Bellavia e Lorenzo Teresi, ence ic artisć visuai, i veit l vet desche n chiam divin che l é te la natura.
L program
Jà en lunesc ai 16 da doman i studenc del Liceo artistich de la Scola Ladina de Fascia scomenzarà a lurèr tel laboratorie didatich te Piaz de Comun vidé dal dozent Davide Deflorian e etres coleghes. Da les 11 ge vegnarà dat l benvegnù ai artisć e a ogneun ge vegnarà assegnà a la brusca la postazions.
En lunesc da les 6 da sera te Piaz de Comun (se fossa catitemp te sala del Consei de Comun) sarà l moment ofizial de avertura, con i intervenc di artisć che portarà dant sie projet. Te chesta ocajion desvalives esperc rejonarà del ‘vöit’ dal pont de veduda de sia spezialisazion scientifica o profescionèla: l neurolinguist Andrea Marini portarà sie input sul vet tel cef; l architet Alberto Winterle rejonarà del vet a livel urbanistich, Marco Vedovato di Astrofili de Fiem del vet tel spazie e la menacrep Marika Favé del sens de vet tel rampeèr sui crepes.
L simposie jirà inant fin en vender da doman, canche la operes vegnarà portèdes te la bela sala esposizions del Liceo Artistich de Fascia a Sèn Jan, olache da les 11 sarà la conclujion con la restituzion dedant ai studenc e a duc chi che vel tor pèrt. LG