Conscric, DJ Sem ve speta!

Chest’outa l’Union di Ladins se ouc ai conscric, a chi che festejarà l travert emportant di 18 egn. La sociazion, ensema al Pian Joegn La Risola, se à pissà a na scomenzadiva fora de anter. Descheche ve aon jà antizipà, l’idea l é chela de chiamèr ite i joegn del 2006, 2007 e ence chi del 2008 per ge fèr cognoscer i ric e la tecniches per poder realisèr enstesc i elemenc più emportanc de chesta tradizion amò feruscola te Fascia: l ciapel e l gramièl personalisé.

Vegnarà endrezà n laboratorie artistich-creatif olache i podarà emparèr a fornir su l ciapel con fiores e vetes e a decorèr l gramièl brun col didament de la esperta dessegnadora Letizia Soldà. Ma l projet no l é dut chiò.

La scontrèdes sarà viventèdes da DJ Sem, inom d’èrt de Samuel Cincelli, clas 1994 da Poza che à na gran pascion per la musega. A DJ Sem ge sà n gran bel sperimentèr e anter si esperimenc musicai l à tout fora cianzons dal repertorie folcloristich ladin e l les à remixèdes e lurèdes fora per ge dèr na caraterisazion più moderna e joena. Tropes de chisc toc de musega i stac interpreté ence da desvalives joegn, conscric e no, che con gran gust i se à binà per i registrèr, ge dajan a chesta vida n nef sbunf.

Chesta medema cianzons les vegnarà proponetes dal vif per la pruma outa proprio en ocajion de la scomenzadiva de l’Union di Ladins »Conscric« en program per i meisc che vegn. Donca DJ Sem l à endrezà n repertorie dut da grignèr e da balèr che no l veit l’ora de ge fèr scutèr a vo conscric.

No ve resta auter che ve scriver ite a la scomenzadiva che veganarà endrezèda te Ciasa de la Moniaria a Sèn Jan. Per aer maor informazions se pel chiamèr l’Union di Ladins al numer 0462/764545, chi che vel se enscinuèr i pel manèr n messaje whatsapp al medemo numer.