Cors per emparèr a depenjer a la fascèna

L’Union di Ladins de Fascia, con sie president Fernando Brunel, endreza n cors per emparèr l’èrt de la tradizion. L é temp per se enscinuèr ite fin ai 11 de otober.

Do l bon ejit de acà doi egn, l president Fernando Brunel de la Riza se met endò a la leta per fèr n cors de depenjer a la fascèna. L envit l é out a duc chi che aessa gust de emparèr l’èrt aldò de la tradizion fascèna e che vel proèr a depenjer enstesc n scagn, na pazeida, n picol scrign o che che i à te cèsa o ge saessa bel fornir su.

Chest’outa l cors vegn endrezà a pe pian de la Ciasa de la Moniaria a Sèn Jan, la neva senta de la sociazion, olache l é lèrga assà per duc per lurèr. I partezipanc podarà se portèr da cèsa èrc e massaries da zacan da depenjer e l’Union la metarà a la leta i colores e i materièi e ence vèlch picol oget de legn.

L cors tacarà ite en jebia ai 7 de november e l jirà inant per 7 scontrèdes, ogne mèrtesc e jebia enscin ai 28, con orarie 14:00- 17:00. L cost l é de 20 euro e l é temp per se enscinuèr ite fin ai 11 de otober che vegn al numer de telefon o whatsapp 0462 764545 opura a la mail union@ladinsdefascia.it.