Recorc en musega
L’Union di Ladins de Fascia prejenta na neva publicazion de musega. Se trata de n regoi de diesc cianties per fascian scrites e armonisèdes a cater ousc per coro da omegn da Pietro Decrestina da Palua.
L maester Pietro l é da Soraga ma da egn l é enciasà a Roma. Do aer fat l Conservatorie a Trent l é jit a stèr a Roma e l se à scrit ite al Pontificio Istituto di Musica Sacra olache l à ciapà l diplom ‘Magistero in canto gregoriano con equipollenza in musica corale e direzione di coro’.
L à ensegnà te la scoles mesènes educazion a la musega e l se à dat ju coi corsc de composizion. Del 1978 l à tout su la catedra de teoria e solfeggio te la scola comunala de Viterbo olache l ensegna amò aldidanché. Pietro l é semper restà n muie leà a sie paisc e a sia val, ogne istà l vegn deretorn a Soraga olache l à cèsa fora Palua.
Acà doi egn l à tacà a scriver la pruma cianties per coro da omegn per fascian e l é stat proprio en ocajion de na intervista per La Usc di Ladins che l é vegnù fora l’idea de fèr na regoeta per les meter a la leta di cores o de chi che à gust per l ciantèr. Endèna Pietro n à scrit de autres e en dut l n à metù ensema diesc. Te chesta cianties l conta de si recorc de n’outa, de canche l era bez, de chi de cèsa, de la mont de Fuciada e de jent da Soraga. L à armonisà ence doi cianties del Canori e no podea mencèr na sia elaborazion de ‘Soraga la é bela’, doventèda mingol l inn del paisc.
L lurier de trascrizion de la musege l é stat fat dal joen Jan Dellantonio, ence el da Soraga, che l studia composizion a l’Academia Saint Louis de Roma e l conseier Fabio Chiocchetti à didà a meter ensema la regoeta che vegnarà prejentèda proprio l dì de la sègra de Soraga, en Sèn Piere e Paul, ai 29 de jugn a La Gran Ciasa da les 16:30, col sostegn de l’Aministrazion de Comun.
Te chesta ocajion se podarà scutèr vèlch ciantia de Pietro Decrestina, portèda dant per piano e ousc dal maester Paolo Bernard e da la sopran Angela Chiocchetti. L’Union di Ladins à fat stampèr mingol de copies de la regoeta che ge vegnarà data fora a chi che à piajer de l’aer, aboncont duta la partidures de la cianties e i audio con la oujes spartides vegnarà metudes ence online su la piata internet ‘Recorc en musega’ de l’Union di Ladins con chela che les posse vegnir scutèdes, emparèdes e portèdes dant dai cores de noscia val.
»Ge sporjon n gran detelpai al maester Decrestina – à dit l president Fernando Brunel – per aer metù a la leta sia cianties e se auguron che les vegne toutes su per fèr crescer l repertorie musical per ladin.«
La sociazion à intenzion ence de fèr na regoeta de cianties liturgiches per fascian e per chest la é la leta de duc chi che à enteres, gust o material per fascian da regoer e slarièr fora.
Monica Cigolla, Cianton de l’Union, La Usc di Ladins 24 del 2024