I recorc en musega del maester da Palua

L repertorie de cianties per ladin no l é tant gran e per l’Union di Ladins aer tesć e partidures da meter a la leta de chi che à gust de ciantèr per ladin l é emportant. Con legreza donca en sabeda ai 29 de jugn, dì de Sèn Piere e Paul, la sociazion à prejentà te La Gran Ciasa a Soraga l regoi »Recorc en musega«, diesc cianzons per fascian del maester de musega Pietro Decrestina da Palua, nasciù a Soraga del 1945 e da egn enciasà a Roma. Dut l é peà via amò del 2021 can che Monica Cigolla – che à prejentà l domesdì – la era jita a intervistèr Pietro Decrestina per La Usc di Ladins, do aer sapù da sie nez Peter, maester del Coro Nosc, che chest bèrba l era do a scriver cianties per cor per fascian.

Lo l é nasciù l’idea che l’Union di Ladins aessa podù les regoer e publichèr. Dapò l projet col Coro Nosc se à ferà, ma chel de l’Union l é jit inant, col didament de Fabio Chiocchetti, conseier de la sociazion ma ence espert de musega e autor de cianties e del joen Jan Dellantonio che l studia composizion musicala a Roma: a el ge é stat dat su da l’Union l lurier de trascrizion de la partidures scrites a man da Decrestina.

L é nasciù coscita l bel regoi che l’Union à metù te n codejel dal titol »Recorc en musega. Diesc cianzon per fascian de Pietro Decrestina«. L é stat n bel regal per l maester Pietro da Palua veder sia opera valorisèda e prejentèda, proprio tel dì de sie Sènt inom, dedant a si paejegn da Soraga e a chi de cèsa rué da Roma su.

Fossa stat amò più bel poder fèr scutèr vèlch una de chesta cianties, armonisèdes a cater oujes per cor da omegn, dal Coro Nosc o da etres ciantores, ma no la é jita: ampò dut l publich à podù scutèr la melodies e la paroles sćiantives de vèlch ciantia de Decrestina de grazia a la bela esecuzion per piano e ousc del maester Paolo Bernard e de la sopran Angela Chiocchetti, che à viventà la prejentazion.

Domanà fora da Monica l maester Decrestina à contà de aer scrit chesta cianties per sie nez Peter, soraldut tel temp passà su la ferata anter Roma e Viterbo olache l ensegna, ispirà dal pensier di egn de sia joentù a Soraga. Cianzons olache l recorda Arturo che passèa sciubian con sie ciaval, la mont de Fuciada, la veia majon de Palua, e ence »Le vace de Paulin« sie père, che l à recordà con mingol de comozion. Anter sia cianties ence doi toc del Canori, con na neva armonisazion, e »Soraga la é bela« con variazions armoniches e na integrazion del test per ge dèr na saor neva e mingol più lurèda fora.

L president de l’Union di Ladins de Fascia Fernando Brunel l à recordà canche el e Pietro i era bec a Soraga, e l »mal de ciasa« che ciapa chi se n va da sia val, e con gran piajer l ge à sport al autor e a chi che à colaborà na copia del codejel, che l é stat stampà te n numer de copies limità per i cores.

L é bel veder che l é zachei che à gust de scriver cianties per fascian, à dit Fabio Chiocchetti uzan fora l valor tant musical che cultural de la produzion de Pietro Decrestina, che zachei conscidra senestra ajache ge sà bel arvejinèr la oujes crean mingol de ‘dissonanza’, ma che la é coscita originèla e sćiantiva.

Jan à contà sie lurier fat al computer per la trascrizion, tras en contat con Decrestina e Chiocchetti, l à moscià coche dal sit de l’Union di Ladins de Fascia duc pel jir a veder, scutèr e desćiarièr tesć e partidures e a la fin l à enjignà ence na bela sorpresa: te sala se à podù scutèr con marevea na strofa de la ciantia ‘Orazion a Sènt Antone’ che el enstes, tel curt temp a la leta, l à ciantà te duta cater la oujes e dapò metù ensema al computer, per dèr na idea più chièra del resultat, desmostran che se pel les ciantèr con gran bon ejit.

Paroles de aprijiament per chest lurier é ruèdes da Sandra Bussolon, assessora a la cultura del Comun de Soraga, che l é stat rengrazià per aer metù a la leta la sala. L devalpai de la sociazion é jit ence al Comitat manifestazion, a la Scola de Musega il Pentagramma col president Stefano Lazzer che à emprestà l piano e a la Coprativa de Fascia che à sport l marendel, con la speranza de poder scutèr chesta cianties da un di cores ladins e che chesta produzion posse engaissèr amò zachei a scriver musega per fascian.

Lucia Gross, La Usc di Ladins 26 del 2024