Recorc e festa del Grop Ladin da Moena

»D’uton l é bel se troar con i amisc a se la contar su e passar mingol de temp en compagnia, momenc che ne fasc sentir part de na familia e de na comunità.« Coscita taca ite la letra che l Grop Ladin da Moena ge à manà fora a duc si sozi per i enviar, ensema a l’Union di Ladins, a n bel domarena ensema. L apuntament l é chesta domenia, ai 17 de november da le 16:00 te sala Simonin Maza de le scole de Moena.

Te chesta ocajion vegnarà portà dant l liber ‘Storia de amor e de fadie’ de Isabella Iellici de Penia vegnù fora desche numer spezial de Nosha Jent via per l istà. A la scontrada tolarà pèrt ence Olimpia Rasom che rejonarà de la emanzipazion de le femene e Christian Bernard che portarà soa esperienza de joen pascionà de enrescide anter la jent de età. No menciarà musega e n bon marindel. Te chesta ocajion se podarà ence se abonar al boletin Nosha Jent per l an 2025 e renovar l tesserament a l’Union di Ladins de Fascia.

L boletin Nosha Jent l vegn fora con cater numeres al an, l ultim, chel de otober, l é na regoeta enteressanta de scric e articoi che rejona de la vita de la comunanza, de jent, de recorc, de erbe e fiores e ence de sport. Te chest ultim temp no l é demò autores da Moena che scrif ma ence jent dai autres paijes percheche l boletin vel esser semper de più l speie de duta la comunanza de Fascia.

Monica Cigolla, La Usc di Ladins 45 del 2024