L’Union depenc e festeja coi conscric
L é n uton de gran da fèr chel de l’Union di Ladins de Fascia. Do la bela Festa del Rengraziament l’ativitèdes no se à fermà, alincontra te chest meis de november l é stat endrezà adertura doi corsc.
L president Fernando Brunel se à metù a la leta ence chest an per tegnir n cors de depenjer a la fascèna che l é tacà ite con na pruma scontrèda en jebia ai 7. Te la cèneva a pe pian de la Ciasa de la Moniaria, olache jai 30 egn l era la senta de la sociazion e la redazion de La Usc di Ladins, se à troà n bel grop de 14 persones dutes con la gaissa de emparèr a depenjer aldò de la tradizion fascèna: reses, ucie, scrites e simboi sun mignèles, pazeides, brenteles, carieghes, codees, scagnes e auter. Ti prumes apuntamenc l president Brunel, col didament de Letizia Soldà, ge à moscià ai partezienpanc co dèr ju l grunt e enjignèr i colores, valgugn à jà proà a fèr vèlch dessegn scempie. L cors l va inant ogne mèrtesc e jebia fin ai 28 de november.
La tradizion di conscric se viventea con DJ Sem
La depenta Letizia Soldà, che à fat l’Academia de Bela Èrts a Verona, la é do che la se dèsc ju ence con n auter projet. Tel chèder del Pian de Joegn La Risola, l’Union di Ladins à proponet n cors out ai conscric de la val per smaorèr sie enteres envers la tradizions e la cultura de noscia val, en particolèr. chela belapontin di conscric. En vender ai 8 de november, te la bela e carateristica stala de la Ciasa de la Moniaria, se à troà 5 touses del 2007 che se enjigna a festejèr l travert di 18 egn con l an che vegn. Al projet se à scrit ite en dut 9 joegn da duta la val. Dantfora la referenta de La Risola Stefania Povolo ge à rejonà del Pian de Joegn e de l’ativitèdes che vegn metù dant e dapò Letizia ge à envià via l lurier per se depenjer l gramièl brun personalisà che i conscric se met canche i festeja. Te la scontrèdes che vegn ge vegnarà moscià ence co se fèr l ciapel da fiores aldò de la tradizion.
L projet ‘Conscric’ l é dassen particolèr ajache dut l é compagnà da la musega de DJ Sem, Samuel Cincelli, che l à remixà a na vida moderna e joena la cianties folk de gropes de musega cognosciui de Fascia. Per l’ocajion l à refat ence doi cianties de I Ladins e I Pazedins ciantèdes da Daniele Dorich e Riccardo Francesconi, doi conscric da Poza. La scontrèdes jirà inant ogne vender, se l é vèlch joen che aessa gust de tor pèrt l pel tor contat con Letizia, al numer de whatsapp 0462 764545.
Monica Cigolla, La Usc di Ladins 45 del 2024
