Raida "Do la pedies di pitores fascegn"

Desche acà trei egn, l’Union di Ladins de Fascia endreza da nef la raida a la Krimmler Tauernhaus, la utia olache i pitores fascegn à lascià sia pedies. Enlouta l era stat arjont l refuge da n bon schiap de persones, chi a pe, chi monté e se se aea lascià con l’emprometuda de se binèr amò.

Do doi egn tocé da la pandemia, zacan l é ruà l’ocajion de jir endò­ da nef, ence do l bon ejit del cors de pitura a la fascèna endrezà fora per de oril, na pruma scomenzadiva che volea recordèr l moviment mi­gratorie di artisc’ fascegn del passà, che jia al Lont per se la vadagnèr.

L program en curt, e amò da defenir, perveit de pontèr via da Fascia, en vender ai 8 de messél, dadoman, belebon prest. Se pel cerner de jir monté fin a la Krimmler Tauernhaus opura, chi che é più alené, pel jir ence a pe: se va col auto fin a Kasern, da chiò se pea via a pe per ruèr al Tauernjoch (2660m) e, tras la Windtal, se rua entorn les cater domesdì a la Krimmler Tauernhaus (1700m). Chi che enveze va monté, va per sia strèda passan per Bornech e Lienz. L ultim toch, se pel l fèr a pe fin a la utia e mirèr i cognosciui sauc de èga. Do aer passà na bela sera con la cena te la stua di pitores e aer dormì te refuge, se vegn de retorn en sabeda ai 9 de messèl.

I posc’ per chesta raida i é limité, aldò di numeres vegnarà fat a saer avisa l cost. Per stèr soranet se pel stèr te cambra dopies (€90 a persona) o ti lager, miec con sach da net (€55 a persona). Ge vel se prenotèr al più prest, dant dai 10 de jugn al 0462/764545 o tras mail a union@ladinsdefascia.it.