Se rejona per ladin de film e turism!

Su la ones de Radio Studio Record à scomenzà a jir fora dal meis de oril doi neva produzions de l’Union di Ladins de Fascia, dutes per ladin e segur con n carater gustegol e inovatif.

L prum l é ‘Zeche de curious’ de Jan Dellantonio, na trasmiscion curta ma sćiantiva che porta dant rezenjions de film, serie televijives e libres. L auter nef apuntament l é ‘Piroles de turism’ de Alison Prinoth. La tousa da Ciampedel, prest laureèda a Verona en ‘Lengaz, turism e comerz internazionèl’, la va a descorir l fenomen turistich sot desvalives ponc de veduda, dal chel storich e sozièl, fin a ruèr ai argomenc de discuscion de aldidanché, anter duc ambient e marketing. Jan e Alison l é doi joegn engaissé per chesta neva endesfida, ge aon domanà fora vèlch de più.

Zeche de curious de Jan Dellantonio

Jan Dellantonio, clas 2001, l é da Soraga ma l studia a Fiesole, te la Toscana, a l’Academia de Musega. Jà canche l era al liceum jun Busan, al Rainerum, g’é capità de scriver rezenjions de film o serie televijives. Sie stel de prejentazion l é n muie personèl: l tol ca titoi giusta vegnui fora e sun chisc l porta dant reflescions e a outes ence vèlch critica. E che bela sigla che l à ‘Zeche de curious’: la musega la é stata metuda ensema dal medemo autor del program!

»Rejonar par ladin m’à semper sapù bel e rejonar de argomenc internazionai par fascian no me sà par nia cert: durar chest o chel lengaz l é demò n’autra vida per esprimer na emozion« l ne à dit, canche ge é stat domanà coche ge sà rejonèr per ladin en cont de film de valuta mondièla.

»Al scomenz l é senester se registar e do sentir toa ousc per ladin... ma l é bel! A far rezenjion se cogn saer esser ogetives, ma tel medemo temp dir la toa: n program radio l é na bela ocajion per l far«.

Podede scutèr ‘Zeche de curious’ ogne setemèna su Radio Studio Record de mèrtesc da les 11:00, de jebia da les 15:30 e de sabeda da les 17:45. Online ence sul sit de la sociazion.

Piroles de turism de Alison Prinoth

Alison Prinoth da Ciampedel, clas 2000, l é l’autra jona ousc che fora per chest’aisciuda l’à scomenzà sia esperienza tedò n microfon. Da semper ge sà bel jir su per noscia bela crepes, na pascion che l’à rità da sie père Mario. Tel mond di media ladins Alison no la é segur neva: l’aea prejentà l program de sport de TV Ladina Finalzil per trei egn alalongia, dapò ence Fascia En curt, l program de informazion del Comun General e l’à colaborà con l sfoi La Usc di Ladins.

»Me sà muie bel viajèr, no demò per cognoscer de autra cultures, ma ence per entener coche l turism vif sot de autra formes«. Alison à rejonà te sie program de turism sostegnibol e en curt ence de la storia de chest fenomen, dapò apede l’à tratà ence de overtourism, turism esperienzièl e agriturism. L program l é dassen rich de contegnù, n spieie reèl del percors de studie che à portà dant la tousa. Con Alison, l’Union di Ladins la é do a lurèr fora n program de atualità sul socors da mont, che speron posse pontèr via fora per l meis de jugn.

Podede scutèr ‘Piroles de turism’ ogne setemèna su Radio Studio Record de lunesc da les 11:30, de mercol da les 15:30 e de vender da les 17:45. Online ence sul sit de la sociazion.

La produzion radio la é da scutèr ence online!

Chisc neves programes va a se jontèr a l’autra produzion neva che l’Union di Ladins met ensema, setemèna do setemèna: ‘N bel bondì ladin’ e ‘Che metone pa anché sorafech?’ de Monica Cigolla e ‘Scouta scouta’ de Nicoletta Riz. Dut chest material, apede a chel enjignà da etres colaboradores ti egn (‘Cater ciacoles te stua’, ‘Mizacoles de storia’ e ‘Cognoscion noscia storia’ de Fernando Brunel e ‘Arianeves’, ‘L segnaliber’ e ‘Ousc de noscia jent’ de Fabio Chiocchetti e Lucia Gross), l é a la leta online te la sezion Radio dedichèda.

L’Union di Ladins ge sporc n bel develpai al Comun General de Fascia per sie sostegn economich sul Pian de politica linguistica.