Piates de letradura e de comunanza

L an 2021 per l’Union di Ladins de Fascia l é stat rich de intervenc editoriai, con riedizions de libres de letradura, enrescides storiches e artistiches e i numeres del bolentin Nosha Jent. De firé del 2021 dapò desche zenza l é stat dat fora l’Almanach 2020, segnà da de fona reflescions sul temp e dal mudament sanitarie che à rebaltà sotessora nosc viver.

L é jà tel lurier l’edizion numer 10 del Almanach con meis per meis la patofies de Manuel Riz, la piroles de chel che l é suzedù e i personajes da cognoscer. Desche ogne an l é stat cernù n argoment leà a nosc teritorie. Se spera l posse vegnir prejentà te la Radunanza de la sociazion olache l ge vegnarà sport debant ai sozi e ai aboné a La Usc di Ladins de Fascia.

Soracuerta del nef liber de l’Union di Ladins - Grop da Moena con la regoeta de poejies de don Bruno Daprà

En ocajion de la Radunanza vegnarà prejentà ence la regoeta ‘Fascegn. Retrac de jent da zacan’, che tol ite passa 250 fotografies de noscia comunanza nasciù da la rubrica »Chi él pa?« su La Usc di Ladins e l é jà beleche a compiment ence autra doi publicazions rencurèdes da Fabio Chiocchetti: n liber de poesies de don Bruno Daprà che vegnarà fora en coedizion con l Grop Ladin da Moena e la regoeta di scric de Luigi Canori en coedizion col Istitut Cultural Ladin. N’opera che speron posse vegnir prejentèda al scomenz del 2022, n auter tassel che va a se jontèr al lurier emportant portà inant dal ent de enrescida te duc i ultimes egn. NR