Acioche no vae perdù i Saeres de noscia jent

L’Union di Ladins à lurà fora n nef projet de gran valuta tant dal pont de veduda storich-etnografich che sozièl e la ge à dat inom ‘Saeres. Tutorials de tradizions e mestieres fascegn’. Se trata de na lingia de filmac curc e scempies che à l zil de tegnir vif la particolaritèdes de noscia cultura e vita da vigni dì. Ben segur l é na modalità neva e inovativa de slarièr fora la tradizion e la cultura.

La scomenzadiva é nasciuda da na idea de la conseiera Nives Iori e de la vizepresidenta Nicoletta Riz, sostegnuda dal president Fernando Brunel, dal vizepresident Stefano Weiss e dal Consei entriech. »Saon che l é n muie de Saeres amò te crigna, che semper manco persones cognosc. L é proprio n pecià che no i vegne porté dant a de autra jent. Aldidanché una de la vides per ruèr più apede a la jent l é segur i social e se aon pissà de durèr l format del tutorial per poder regoer chisc Saeres, che l é l resultat de n prozes de perfezionament che nesc crosaves à perfezionà tel jir di centenees« ne à spiegà Nives.

Co fèr la Corona de Avent te n tutorial ‘Saeres’ a la leta su TV Ladina.

Ogne tutorial vegn dapò compagnà da n volantin, na sort de vademecum, che spiega zeche de più en cont a chel saer, ma ence da scontrèdes pissèdes apontin per tor ite la jent e per fèr comunanza. Endèna sul canal YouTube de TV Ladina, te la playlist resservèda, se troa jà doi tutorials su coche se fèsc ite la treces a la fascèna, con e zenza lastech con l didament de Claudia Conta e Katia Weiss e su co fèr la Corona de Avent con Teresa Dantone de la Lis dal Vera, ma tenc de etres i é jà vertiesc e prest i vegnarà porté dant al publich.

N gran rengraziament de cher ge va a Filmart Television per sia gran braura te l’enjignèr chisc prodoc ma soraldut al Comun general de Fascia (più avisa ai servijes linguistics e culturèi) che sostegn semper con gran fiduzia noscia ativitèdes. NR