L empegn de la comunanza per l Zerilo Bora

L aut relief che vegnarà prest restaurà.

Te chest an 2021 l’Union di Ladins de Fascia ensema col Grop Ladin e l’Aministrazion da Moena l à portà inant desvaliva scomenzadives per recordèr trei personalitèdes che se à tant dat ju per la vita culturala: Luigi Canori, musizist e compositor, Tinoto Monech, poet, e Zerilo Bora, artist e fondador de la Scola d’Èrt de Moena. A chest ultim ge é stat resservà i sforc maores, con la publicazion »Cirillo dell’Antonio Bora e la Scuola d’Arte di Moena. Documenti e testimonianze« e l empegn sinergich anter Comun, Parochia e Union di Ladins – Grop Ladin da Moena per l restaure de na sia opera.

L’opera che vegnarà restaurèda

Se trata del aut relief che l é sora l usc de calonia de Moena, na Madona col Bambin enjignèda sot la vida ascorta del Maester Zirilo Bora. Maria Lorenz l’à confermà la proprietà artistica de l’opera: la fegura te mez la é beleche segur opera del student Batistin Defrancesco Gianot, l agnol a man dreta zipià fora da Flora Dellantonio e chel man cencia de Emma Ferrari. Chesta opera la fèsc pèrt di lurieres de abeliment (anter chisc 74 relieves ornamentai sot le gronde) che era stac fac sot l endrez del Professor sul frabicat canche l era stat fat su dal Comun. Do tenc de egn se à vedù l besegn de restaurèr l aut relief sora usc che, restà egn e egn sot l temp, l à perdù l color che l aea enlouta.

Develpai per la donazions

L intervent de restaure l é pervedù per l 2022: l é stat fat domana de contribut a la Soraintendenza di Bens Culturèi che con l Comun i scuerjarà l cost del 75%. L 25% sarà enveze corì da la Parochia de Moena, olache apotin l é jit nosc didament. Cò se ciaparà resposta ofizièla dal ent publich e l’autorisazion per l intervent da man de la Curia se pearà via con i lurieres, porté inant da n restaurador calificà.

Te chest chèder l’Union e l Grop Ladin à destinà al restaure dut chel che l é stat tout ite a vener l liber sul artist e sia scola a sozi, simpatisanc e a desvalives enc (907 euro) e apede a chest l é stat jontà ence la donazions binèdes ensema da la jent (750 euro) e enstadì ge é stat fat n bonifich de 1657 euro a la parochia de Sèn Vile de Moena, che la se cruziarà de portèr inant la pratiches.

Volon rengrazièr de vero cher per sia donazions Luisa Chiocchetti enciasèda jun Busan, Lorisetta Cassan, Alberto Chiocchetti, Bruno e Elisa Fanton, Giorgio Senettin e Gemma Pescosta. Rengrazion apede per l’emportanta colaborazion la Parochia e l’aministrazion del Comun de Moena, più avisa la conseiera Annalisa Zorzi e la vizeombolta Cristina Donei che les ne à proponet chest projet zis de valuta, e duc chenc chi che à sostegnù chesta azion. Chesta operazion à n gran segnificat cultural ma ence sozial, ajache l vel palesèr la recognoscenza de la comunanza de Moena e Fascia envers l Zerilo Bora.

Nicoletta Riz