Paroles fora de crigna

»N lengaz no l’é demò paroles. L’é na cultura, na tradizion, na unificazion de na comunanza, duta na storia che fèsc sù e defenesc che che l’é na comunanza. Dut chest vif te n lengaz.« Chesta frasa del linguist e filosof american Noam Chomsky l é la intestazion del grop Facebook ‘Ladin Fascian’, che à passà via i 1000 componenc e l à arjont n gran numer de interazions. Chest grop era stat metù su del 2018 da Evelyn Bortolotti, che enlouta tel Istitut Cultural ladin de Fascia lurèa al VoLF (Vocabolèr del Ladin Fascian) con Nives Iori e l diretor Fabio Chiocchetti. L obietif l era de tor ite i pascioné de lengaz ladin fascian e aer n strument de ‘consultazion asvelta’ per averjer n lech de confront e schiariment en cont del lessich fascian, che servia apontin a portèr inant l VoLF. »Se trata de n lurier che à besegn de la comunanza: n vocabolèr de la jent e per la jent« scrivea Evelyn Bortolotti, che col medemo obietif jà del 2016 l’aea envià via su La Usc di Ladins na rubrica per portèr dant costions curiouses o particolères che vegnia fora tel cors de l’enrescida lessicografica.

Del 2020 l lurier sul corpus e sui documenc e de confront con esperc e comunanza portèa a la publicazion de la pruma trei letres del VoLF e del 2021, do esser jit en penscion, Chiocchetti tachèa endò la publicazion su La Usc di Ladins de na rubrica sul lessich dal titol »Paroles fora de crigna«, olache vegnia portà dant aprofondimenc sul lengaz ti setores de èrc e mestieres da n’outa, guanc de tradizion, speisa da zacan, piantes e trop de auter, semper con gran fondament e enrescida scientifica, ma ence con n stel divulgatif, lijier e mingol ironich, che aea abù gran aprijiament anter i letores.

Pean via da chesta rubrica, vegnuda fora fin a la metà de chest an, l é jit amò inant l lurier de revijion e comedamenc de Chiocchetti, che à dat vita a n liber de 250 piates dal medemo titol »Paroles fora de crigna« e che tol dant »esprescions fora de cors o pech durèdes del ladin fascian, che nesc dizionères nota sù vèlch outa a presciapech o malamenter« per ge dèr na interpretazion più prezisa, ascorta e segura. N prezious contribut al studie del patrimonie lessical ladin, che l’Union di Ladins de Fascia con sie president Fernando Brunel e l’Union Generela di Ladins dla Dolomites con sia presidenta Milva Mussner à azetà con gran gaissa de stampèr e dèr fora.

»N viac endò tel temp – se lec tel scrit dantfora de la sociazion – olache parola do parola, piata do piata se rua a fon ti misteres de la costruzion del lengaz e de la cultura ladina. Fabio del Goti aur la crigna del lengaz fascian e l tol fora man a man paroles più o manco desmentièdes, paroles problematiches e senestres da entener [...] l’outa sotessora chesta paroles, l va a veder l’etimologia, l les compèra co l’autra variantes ladines e coi dialec rejoné dintornvia la Ladinia, l va a chierir sia doura tel passà e inchecondì a na vida che les posse se scassèr ju l polver del temp e les vegne endò metudes al luster.«

L liber ades l é en stampa, l ge vegnarà portà dant a la comunanza en vender ai 18 de otober da les 17:30 al Albergo Rizzi de Salin a Pera, olache vegnarà sport debant la publicazion e na cercia de magnadiva da zacan col compagnament de mingol de musega. L’Union di Ladins de Fascia ve envia duc de cher a na bela sera en compagnia del autor e de duc chi che à didà a tor la paroles fora de crigna!

Lucia Gross, La Usc di Ladins 2024