L é temp de Rengraziament

La sociazion ladina é vertia a ve recondèr n auter apuntament. Rejonon de la Festa del Rengraziament, che oramai da tradizion l’Union endreza vigni an d’uton. Chest an la sarà spartida sun doi dis, en sabeda ai 26 e en domenia ai 27 de otober, e la vegnarà metuda a jir a Sèn Jan adum con l Comun General de Fascia e dedichèda a la Moniaria, veiora istituzion e ritajon de noscia comunanza, ma ence frabicat storich anchecondì proprietà del Comun General, che do n lonch lurier de restaure ades l à troà denef na bela parbuda e l é a la leta de la comunanza. Te chest frabicat, defat, à endò podù ite l’Union di Ladins, che laite a pepian l’aea abù sia senta per n muie de egn, con la redazion de La Usc di Ladins, e sunsora l é ence i Servijes linguistics e culturèi del CGF.

Te chesta ocajion l’Union vel rengrazièr ence i ritadins di monesc, che amò anchecondì i porta inant te duta la parochies de Fascia sie prezious servije.

L program perveit en sabeda ai 26 de otober da les 17:00 te Ciasa de la Moniaria la scontrèda dal titol »Moniaria: angern e anché« col storich prof. Cesare Bernard, l projetist del intervent de restaure architet Marco Giovanazzi e l procurador del Comun General de Fascia Giuseppe Detomas; l domesdì se serarà su con n picol aperitif.

En domenia ai 27 la festa pearà via con la defilèda da les 10 da doman dedant a la senta del Comun General per jir en defilèda con la Musega da Vich, i Scizeres e i Gropes de folclor fin a la Pieif, olache don Andrea Malfatti ofiziarà messa grana.

A la fin de la messa sarà l rengraziament ai monesc e dapò n picol conzert de la Musega e la salva di Scizeres. Vegnarà benedì la Ciasa de la Moniaria e dapò avert si ujes a duc per na vijita al frabicat con la veia stua, la stala, la cèvenes e duc i locai restauré, e se podarà se fèr na na viva e na cercia da festa enjignèda da le Volontadive de Vich. Duc é envié tor pèrt.

Cianton de l’Union, da La Usc di Ladins