Nosha Jent 3 del 2022: l é ruà l nef numer!

Stimè letores, do na istà più ciauda del solit, che à portà n gran moviment de ghesć sćiampè da le zità e vegnui a se paussar e a troar te noscia val arie manco ferse, e che à portà laoro per duc chi che laora tel ciamp del turism, ve sporjon l terzo numer de “Nosha Jent” con desvalives argomenc. Anter chisc, le recordanze per jent e persone che se à dat ju per nosc lengaz, cultura e tradizion, ma ence la recognoscenza per chi volontadives che viventea da tropes egn le sociazion te noscia comunità.

La soracuerta del nef numer, con n bel retrat de Alberto Roch.

Te sto numer ne prem portar al luster na fegura umola, chela de p. Samuele, che i più tropes no cognoscerà, ma che à abù desvalives recognoscimenc per chel che l à fat te so miscion en Cina envers i manco fortunè. Ogni comunità la é fata de persone desvalive e ades più che mai se à besogn de fegure che ne porte ejempies e esperien- ze per le far crescer te la sozietà: te la diversità podon emparar e se confrontar.

Sti ultimes egn no i é stac sorii: se n aon ascort – do tante limitazion – che chel che conta dalbon l é star ensema e aver na vita soziala. L segn che l Covid ne à lascià l é ancora fon, con na crisi generala per chel che suzet tel mondo che ne vesc sperdui a vardar envers l dave- gnir. Problemes soziai, emergenze de ogni soòrt ge n é trope, còme che se pol engejer tel articol su la mencianza de l’èga: no podon più dir che noscia val l é n Paradis.

L é besogn de recostruir leames, condivijion e contac che pode ne solevar e ne dar coragio. La tentazion de se serar anter nösc mures, egoismes e interesc la é grana, ma vardar al de là de nosc picol ort l é l fondament de la solidarietà e del volontariat, de la vejinanza con l auter tel moment del besogn: l é valores tramanè da le generazion passade che no podon desmentiar. Con chest spirit, ve recorde che ai 23 de otober sa Ciampedel ve- gnirà fat la Festa de Rengraziament apontin dedicada al Socors da mont e a duc i volontadives de la Protezion zivila che tant i à fat do la gran desgrazia su la Marmolada e per l’egajon de chesta istà.

Na bela ocajion per ge dir n gran Diovelpae.

Angela del Goti