5° Simposie Toni Gross: dalbon n ‘surplus’
‘Surplus’ l é l titol che ge é stat dat a la 5^ edizion del Simposie Toni Gross, e dassen chest’outa l event à responet al tem, svilupan l conzet de surplus: percheche tel zipièr, per tor fora l’ènema dal legn ge vel semper tor demez che che l é ‘de massa’; percheche per fèr sia operes i artisć à durà ence elemenc de scart, vèlch che per zachei de etres l era ‘de massa’ e i aea trat demez e che à ciapà na neva vita; ma soraldut percheche chesta neva formula é stat bona de ge dèr dalbon n ‘surplus’ desche valor de più, sorafora la proponeta de zipièr tel segnificat più tradizionèl de la parola.
L nef diretor artistich
L’idea de »sperimentèr, ajache l simposie l é fat proprio per passèr via i ores de la comfort zone del classich simposie su legn, per se dèr ju te n mescedoz anter èrt visuala e musega« é nasciuda da Pierangelo Giacomuzzi, chiamà acà pec meisc dai organisadores (Union di Ladins, Scola de Fascia e Comun de Sèn Jan) al ruol de diretor artistich del Simposie.
Pierangelo Giacomuzzi do l Istitut d’èrt a Poza l à fat l’Academia de scultura tel legn a Verona e chela del mèrmol a Carrara e do l à tacà a se dèr ju te la sperimentazion. L é mez artist e mez bacan, mez ladin e mez fiamac, ma bon de se trèr ite semper de pien te chel che l fèsc, da l’idea a sia realisazion concreta, con duta l’atenzion e l enteres per l lengaz ladin zenza desmentièr chel de Fiem e per la sperimentazion zenza descognoscer la tradizion.
L é stat el a cerner fora i partezipanc, e l à metù ensema la 4 cobies che dai 12 ai 16 de setember les à lurà per sia realisazions de èrt e sons te piaz.
L leam con Toni Gross
Al scomenz zachei à abù l dubie che a voler sperimentèr conjobian scultura e musega se fossa jic massa dalonc da la pruma idea de n simposie che recorde Toni Gross (1932-2005). L leam anter la fegura de professor, zipiador e alpinist e l mond di strumenc e de la notes se à palesà tel basrelief, amò conservà tel Liceo Artistich de Fascia, fat dai studenc sot la vida de Toni Gross, che à fat recordèr che anter l auter Gross era stat ence president de la Musega de Poza.
La performance finèla
L Simposie se à serà su en vender domesdì, a cajon del temp no a l’averta ma te tendon de Poza, olache i partezipanc à podù ge dèr ousc ai strumenc realisé fora per la setemèna col didament de la sociazion La Grenz per la pèrt tecnica, se prejentèr e portèr dant sia esperienza de partezipazion e sia operes.
L badiot Tobias Tavella e Peter Kompripiotr Holznecht i à dit de aer tout pèrt zenza ruèr con n projet definì ma de esser rué col estro de chierir, de se lascèr menèr da l’ispirazion del moment, tolan su dal teritorie, da la jent e da la dinamiches. I à vardà i materièi che i aessa podù troèr, ence reziclan refudames troé te desćèria e tel bosch. I à lurà co la lum e con microfons a contat e con n telon e na parabolica i à realisà n gran tamburle scenografich. I à fat ence na sort de ciaura per seèr bores olache na bora sbetèda con sostes sonores daite e soravia produjea sons desferenc.
Arianna Gasperina e Max Castlunger é peé via da la forma più classica de na ela, a chela che l musizist badiot ge à dat inom Löm. Tel corp fat da la zipiadora demò co la motosega l é stat metù ite n xilofon, n metalfon e n auter strument fat con tubi de acèl, vardan de armonisèr dut tant a livel visif che de son. Max Castlunger i à encordé acioche duc i vae a una su la tonalità e i posse vegnir soné tel medemo moment ence da 4 persones desferentes. Chesta opera era completèda da Saeta, l cian de Löm, n ciuch de legn che sbetà e con na membrana ence chesta de legn l é doventà n tamburle ‘vegan’ olache l artist badiot à podù dèr proa de sia gran braura.
Guglielmo Bevilacqua e Giorgia Marchetti i era jà peé via con l’idea de realisèr na sort de flipper che posse creèr ressonanzes casuales aldò de olache croda la balota: na sort de endesfida per portèr a na dimenscion mecanica i conzec duré trop anchecondì da la musega eletronica.
De gran efet ence la realisazion de Markus Gasser e Gianluigi Zeni: l prum fèsc flauc tradizionèi e l secondo l é scultor e ensema i à pissà de realisèr n flaut dopie tradizionèl di indians de l’America da poder sonèr con na facera semper de n indian natif american, che crea ence n leam co la tradizion de la faceres de Fascia. I à creà ence n didgeridoo, strument tipich di aborigens autraliegn, recavà da n pec sech troà tel bosch, sbetà e scurtà acioche l posse sonèr dalbon.
Per l publich l é stat dalbon na marevea e n event fora de anter. I organisadores à rengrazià i sostegnidores del Simposie, en particolèr la Region Trentin Sudtirol, l Comun General de Fascia, l’ASUC de Poza e l’APT de Fascia, i artisć, l diretor artistich, i ensegnanc e i studenc del laboratorie didatich e del laboratorie de tislerai de la Scola e duc chi che à tout pèr e didà.
La sperimentazion à garatà e te doi egn se podarà veder i svilupes del nef troi envià via. Endèna duc é envié a ge stèr do a la piata Facebook del Simposie, per veder la novitèdes.
Lucia Gross, La Usc 37 del 2022