Neves obietives per l’Union di Ladins de Fascia

La seconda sentèda del nef consei de l’Union di Ladins de Fascia vidà dal president Fernando Brunel da Soraga la é stata en vender ai 6 de november en videoconferenza.

Dò la pruma pèrt più formala con l’aproazion del verbal di 19 de otober, con la neves da l’Union Generela di Ladins dla Dolomites e con l’istituzion de na comiscion per la revijion del Statut, se é passé a l’endrez di cater gropes de lurier che se spartirà l’atività che la sociazion vel portèr inant.

Social e sit Internet

L prum grop de lurier se cruziarà de la gestion di canai social Facebook e Instagram e de la elaborazion del nef sit Internet. La piates social, enceben che sun chestes fin ades sie stat fat n bon lurier, les à besegn de n picol ma dezisif mudament, ajache ge vel lurèr per aer maor interazion con la comunanza. Per fèr chest se é jà al lurier per elaborèr n nef calandèr de intervenc, che perveit neves contegnui video alterné a jeghes de paroles e curiositèdes en cont a chestes.

Apede a chesta neva vida de durèr i social, l’é emportant meter apede na ‘cèsa virtuèla’ che posse esser strument per se fèr cognoscer a na vida trasparenta e completa. L nef sit Internet cogn esser n lech de enconter e de condivijion sozièla.

Manifestazions

L grop de la manifestazions se cruziarà de coordenèr e endrezèr i evenc de l’Union di Ladins de Fascia. Apede ai evenc tradizionèi desche la Radunanza di sozi e la Festa del Rengraziament, l nef consei se met dant l’obietif de enjignèr ence de etres apuntamenc. Curioujes l’é la idees che é vegnudes fora enscin ades: co bater la fauc, co jièr a la chèrtes, co filèr la lèna, ma ence i fondamenc per jir a fonches. Dut chest tegnan semper a ment l prinzipie che l’Union cogn se oujer a la comunanza, a na vida scempia, aan semper desche referiment l stravardament de nosc lengaz.

Una de la prioritèdes sarà segur l’endrez de na atività de promozion per i trei neves libres de l’Union (de chest podede lejer chiò apede).

Colaborazions

Desvalives conseieres arà l’encèria de mantegnir e portèr inant i raporc de colaborazion con la istituzions del teritorie, con l’Union Generela di Ladins dla Dolomites e con la Unions de l’autra valèdes. L prinzipie per portèr inant na colaborazion funzionèla cogn esser la volontà de lurèr en sinergìa su ‘desvalives fronc’ per valorisèr nosc lengaz. Te chest chèder l’é emportant tor pèrt a l’endrez de scomenzadives a livel interladin e se dèr jù per n maor coordenament te val.

Editoria e media

Chest ultim grop à desche obietif l coordenament e l’endrez de la publicazions de l’Union di Ladins de Fascia e de rencurèr i raporc mediatics con televijion e radio. Apede a chest, la più gran endesfida sarà esser bogn de meter a jir na azion de arvejinament de la jent a la letura e a la produzion leteraria. Con chest se enten ence la publicazion de La Usc di Ladins: fossa dassen n bel zil esser bogn de arjonjer te Fascia l numer de 600 aboné.

Chisc gropes à l’obietif de miorèr l’atività de l’Union di Ladins de Fascia e ogneun de chisc arà n referent che se coordenarà con i etres raprejentanc tras ence la doura de na piataforma de teamworking (de chest ve rejonaron più inant). I sozi pel se fèr inant per dèr na man a portèr inant chesta scomenzadives o demò per dèr vèlch consei, chiaman te senta te orarie de ofize al 0462/764545.

L’Union di Ladins fèsc ence a saer che l Comun de Sèn Jan à mudà fora la direzion de la sociazion che ades é te Strada de Pra dal Monech, 3.

Nicoletta Riz