Na bela Union coi joegn scritores fascegn
Ge à fat n gran cher ai conseieres de l’Union di Ladins de Fascia saer che joegn fascegn se dèsc jù a scriver per ladin, e na gran legreza veder che la sociazion pel sostegnir la stampa e la difujion de sia produzions.
I é ben 3 i libres con contìes de autores fascegn de età mesèna sot i 30 egn che vegnarà metui a la leta de la comunanza inant che sie fora l’an.
»Mans da tera«
L prum l’é jà sun desch, l’à per titol »Mans da tera« e l’é nasciù da na idea de la sociazion Inout. L se ouc ai bec di ultimes egn de la scola populèra e de la mesènes con 6 contìes, olache i trei autores Sebastiano Dorich, Stefano Riz e Thomas Zulian i rejona de ambient travers trei feruscoi personajes. Pina, Flip e Carleto te sia aventures i à l met de se troèr dedant a desvaliva costions ecologiches e de pissèr a chel che ogneun pel fèr, te sie picol, dedant a problemes grieves desche l sciudament global, l consum de èga, la produzion de refudam e coscì inant, semper a na vida gustegola e enteressanta. Chest bel liber, con la ilustrazions percacentes de Fabian Mosele e la grafica eleganta de Emma Segat, l’à abù ence l sostegn del BIM Adesc e se pel l troèr te senta de l’Union di Ladins a Sèn Jan, spetan l’ocajion miora per poder l dèr fora ence ai scolees.
»L Segnor de Dolèda e autre contìe«
N auter liber ruarà a dis a Sèn Jan da la stamparìa: l’à per titol »L Segnor de Dolèda e autre contìe« e l’é l frut del lurier de n joen del ’92 da Moena che l ades l vif te la Svezia olache l studia linguistica e letradura hindi. Te 13 contìes, più n scomenz e n epilogh, Armin Chiocchetti ne sporc piates de narativa moderna e descantèda, olache se troa referimenc a la letradura ladina e no ladina e na richeza lessicala, na cognoscenza de la toponomastica e de la vita da bacan, na capazità de jir ite te la psicologìa de personajes de ogne sort e de lejer i mudamenc del temp che fèsc dalbon marevea, soraldut te n autor scì joen. Chest liber, de la colana »L Dragonzel« data fora da l’Union ensema con l’Istitut Cultural ladin, l’é stat fat en colaborazion con l Grop Ladin da Moena e l ge vegnarà sport a duc i aboné a Nosha Jent.
»M. J.«
En ultima, per da Sèn Nicolò, ruarà ence la terza publicazion: l titol l’é »M. J.«, acronim de Mary Jane, tousa da Cianacei che travers la paroles de 10 desferenc joegn autores fascegn vif con sia familia l temp del coronavirus e de la clausura. Tel scriver n tochet de la storia de chesta tousa, che jà da l’inom vel esser n personaje de la vita reèla de noscia val, ma ence de la vita de duc en generèl te chest an senester, ogneun de nesc autores met laìte i pensieres e la emozions che l’à vivù en pruma persona ti meisc più grieves. Daniele Verra, joen del ’93 da Cianacei laureà en letres modernes, l se à pissà dut l projet e l’à tout ite i etres 9 joegn scritores, dapò l’à traslatà dut ence per talian, per slarièr fora amò de più l valor global de chesta esperienza e lascèr n recort fon di momenc più grieves che à condizionà e straout i dis e l temp te chest an besest, che se spera dassen che reste vèlch da unich.
Trei libres desferenc, ma leé da la gaissa e da la braùra de duc chisc joegn fascegn, che scrif vigniun te sia varianta, tel lengaz sćiantif de cèsa, fajan crescer a chesta vida la letradura ladina de anchecondì.
Lucia Gross