Na messa en recort de Veronica del Tinoto Gabana
L’opera »La Fenster tel se levar de la luna«.
De beleche 100 egn, ai 4 de aost del an passà Veronica Zanoner del Tinoto Gabana la é se n jita te la pasc del Segnoredio. La era nasciuda a Moena del 1922 e, enceben che la fosse se n jita a star jun Busan entorn la fin di egn Cincanta, te sie cör l é semper restà so paes nadalin. Belimpont descheche l’à lascià scrit te so testament, acà valch mes so cender é stat portà te cortina de Moena apedejù gejia de Sèn Vile, lo che ades la paussa.
Veronica Zanoner del Tinoto Gabana.
L’artista e poeta da la vena zis ecletica l’à semper abù n fon leam con la cultura e l lengaz ladin e ti egn l’à semper vardà via chisc valores: Veronica l’à scrit poejie e contie, l’à colaborà col boletin Nosha Jent e La Usc di Ladins, l’à depent tropes cadres. Con so om Luigi Piccoliori e su spenta del preve del Ors, don Massimiliano Mazzel, l é stat una de le prime colaboradore de la Radio Ladina fora per i egn Cincanta e Sessanta. »Leam ke rekonjonc«, la regoeta de poejie data fora dal Grop Ladin da Moena del 1987, tol ite si scric de maor valuta e che palesa te la mior vida sia esprescion e sentiment filosofich e artistich; e amò la se à dat ju per meter su la Comunanza Ladina jun Busan. La se à dat ju e la se à sproà con siöi penie e colores fin tinultima: del 2021 l Istitut Cultural Ladin ge à dedicà lo da la ostaria Rampeèr a Ciampedel la mostra personala »N scrign o na fior«. Tras soa letradura e art fegurativa l é stat segur stat una de le persone de maor relevanza per l nef sbunf cultural e artistich vegnù adalarch do da la Seconda Gran Vera: soa opera no fasc auter che mosciar so amor sćiantif envers soe raisc ladine e soa fona spiritualità.
L Comun de Moena co la colaborazion del Grop Ladin e l’Union di Ladins de Fascia ensema col fi dotor Giuliano Piccoliori envia duc a tor part a la Messa che vegn dit su en so recort ai 17 de jugn da le 6 da sera te gejia de Sèn Vile a Moena. La funzion vegnarà viventada da le museghe che à scrit so fradel Luigi Canori, Ermanno Zanoner del Tinoto Gabana, ciantade per l’ocajion da la sopran e presidenta del Grop Ladin Angela Chiocchetti del Goti, e dal grop de joene ciantarine »Cianton da Marevea« compagnade al orghen dal maester Fiorenzo Brigadoi. NR (La Usc di Ladins 22 del 2023)