A la Krimmler Tauernhaus do la pedies di pitores fascegn
L grop de fascegn che l an passa é jic a la Krimmler Taunerhaus.
Ence chest an l’Union di Ladins de Fascia met a jir la raida a la Krimmler Tauernhaus, la utia olache i pitores fascegn del passà à lascià sia pedies.
L program perveit de pontèr demez da Fascia, aló da la senta de l’Union di Ladins a Sèn Jan, en sabeda ai 24 de jugn belebon prest, da les 5 dadoman. Se pel cerner de jir monté fin a la Krimmler Tauernhaus opura a pe. Te ogne cajo se l é meso, l é benfat vardar de tor manco auti possibol.
Per chi che va a pe: se va col auto fin a Kasern olache se l lascia ju. Entorn la una se rua al Tauernjoch (2660 m) e se se ferma a se magnèr zeche fora de prossach. Do aer passà fora la Windtal, se rua entorn les cater o les cinch domesdì a la Krimmler Tauernhaus (1700m). Ben segur ge vel se tor do la mondura e i ciuzé da mont, zeche per se parèr da la pievia e vèlch da marena te prossach.
Per chi che enveze va monté, da Longega se va inant enscin a Bornech e da chiò per Lienz. Tras l Felber tauerntunnel e Mittersill se rua a Krimml, olache se lascia ju l auto e se pel marenèr.
Entorn mesa les 3 domesdì se pel tor l taxi per jir a la Tauernhaus opura chi che vel pel ence jir a pe e mirèr i cognosciui sauc de èga, ge vel doi bona ores. Entorn a les cater o les cinch domesdì se rua a la Tauernhaus e se se troa con i etres.
Da sera se cena duc ensema te la bela stua del 16° secol olache se pel veder i depenc e la iscrizions del 19° secol fac dai depenjadores fascegn che pontèa demez a pe e i se fermèa a pussèr per do jir olache i cognea per fèr i pitores e i decoradores.
L an passà l president de l’Union Fernando Brunel ensema col vize president del Istitut Cultural Ladin Franz Dellantonio Tasin à depent su n tulin de la stua simboi storics e decorazions che rechiama la tradizion fascèna e na frasa per fascian. Donca chest an chi che dezidarà de jir podarà mirèr ence chesta opera rica de segnificat e tant aprijièda ence dai patrons del refuge.
En domenia ai 25 da les 7 se disna duc ensema, dapò chi che va a pe ponta demez per vegnir de retorn. Dal mesdì se se ferma a la Birnlückenhütte/Rifugio Tridentina per marena e dapò se va amò a pe per ruèr entorn les trei o les cater domesdì a Kasern.
I posć per chesta raida i é limité, l é benfat se prenotèr dant dai 9 de jugn, al 0462/764545 o tras mail a union@ladinsdefascia.it.