Antropolad IV à avert sia enscinuazions

Na lezion de Antropolad di egn passé, col diretor del cors, l prof. Paul Videsott.

Da pech l é stat sotescrit l schem de convenzion anter la Provinzia autonoma de Trent, l’Università Ledia de Busan, l’Università de Trent e la Scola Ladina de Fascia per meter a jir la quarta edizion del cors de auta formazion Antropolad e ades l é stat avert la enscinuazions.
La neva edizion del cors, che à regnèda doi egn, pearà via d’uton del 2023, la jirà inant per i doi egn academics 2023-24 e 2024-25 e la se serarà su de setember del 2025. 
L cors, che vegn ativà se l é amancol 5 scric ite e per no più che 50 persones, l se ouc en particolèr a chi che ensegna o volessa ensegnèr te la Scola Ladina de Fascia, ma l é avert ence ai operatores culturai de l’area ladina dolomitica che volessa smaorèr sia competenzes ti setores de la linguistica, la letradura e cultura ladina, l’antropologia alpina e la didatica.
La lezions vegn tegnudes per talian e per ladin, les é debant (fora che l cost per la imatricolazion e l atestat) e les vegn metudes a jir te Fascia, te la senta de la Scola a Sèn Jan per 4 semestres; l é pervedù na atività didatica en dut de 18 CFU con frequenza de obligh amancol al 80% de la lezions.
Se pel se scriver ite fin ai 6 de messèl dal sit: https://www.unibz.it/it/faculties/education/antropolad/ de l’Università de Busan e per aer de autra informazion se pel manèr na mail a: paul.videsott@unibz.it o a paola.bassanello@unibz.it o amò chiamèr al numer 0472 014000 (facoltà) o 0472 012200 (secretariat studenc).

La Usc di Ladins di 26 de mé (Lucia Gross)