L'é ruà M.J.
Paroles dantfora
L’é stat dalbon n an fora de anter, l 2020. N an che ne à fat padir, ne à fat pissèr, ne à fat fèr robes che fin pec meisc dant no assane nience cherdù de poder fèr.
De tropes i à scrit de la situazion creèda da chesta malatìa pandemica che à metù sotessora dut l mond e ence Daniele Verra à pissà de scriver, ajache – l disc – i scritores da semper i ciapa ispirazion dai moments più neigres.
Chest joen da Cianacei l’à ampò cernù na strèda desferenta metan a jir n projet deldut particolèr, apontin descheche particolèr l’é stat per duc l temp de clausura del 2020. N projet che el enstes deschiaresc te la paroles de introduzion de chest liber, na endesfida che aessa podù portèr a ejic deldut desferenc e che dò n lurier belebon lonch l’à dassen garatà.
Daniele Verra, ensema ai etres 9 joegn scritores che l’é stat bon de tor ite a scriver per fascian, ne sporc n liber enteressant, olache ogne letor pel troèr l’esperienza de chi meisc senestres e meter a confront si pensieres e sia emozions con chi che vigni autor ne met dant travers la storia de Mary Jane e de sia familia.
Te chest liber l’esperienza individuèla doventa donca esperienza coletiva e n toch de storia de noscia comunanza doventa n toch de storia de dut l mond. L’era chest apontin l’obietif del projet; per chest Daniele à cernù per la protagonista, che vif a Cianacei te n contest deldut leà a noscia val, chest inom che va sorafora i confins; per chest l’à volù fèr ence la traduzion per talian.
Con gran lurier per cojir ensema i toc di desvalives autores l’é stat bon de ge dèr continuità e coerenza a la narazion e de troèr l fil giust per leèr ite ence la soracuerta.
Duc i autores se merita de bie compliments, ma n rengraziament amò maor va a Daniele Verra ajache sorafora l valor leterèr, chela che l’à portà a compiment l’é na operazion culturèla de gran segnificat per noscia comunanza ladina.
L’Union di Ladins de Fascia é donca contenta e stolza de aer tout sù la proponeta de dèr fora chest liber, e la ge augura a Daniele e ai etres joegn autores che i posse troèr l’ocajion e la vida de valorisèr sia capazitèdes per l ben de la cultura te noscia val.
A duc la ge augura bona letura, con la speranza che l’an 2020, bisest e tant particolèr, l posse restèr dalbon unich.
