Cedean toron per l Almanach
L’Union di Ladins de Fascia la se enjigna a n nef e emportant travert: la publicazion e la prejentazion de la diejema edizion del Almanach. Ei, dalbon coscita, l é jà passà 10 egn da la pruma edizion de chel che l é doventà n codejel let, sfoà e aprijià dai fascegn e no demò. L era l 2013 defat canche i sozi de l’Union di Ladins de Fascia e i aboné de La Usc à ciapà en don per la pruma outa chesta publicazion.
Ti egn l Almanach l é stat vedrina di fac più emportanc sodezui via per l an tanche passà e l à didà a tegnir adiment dates e avenimenc, n scrign de memoria che an do an é doventà semper più rich.
Inant de ve contèr mingol i contegnui del nef Almanach ve meton en consaputa che l vegnarà prejentà en domenia ai 13 de mèrz da les 17:00 te sala de Consei de Comun de Sèn Jan a Poza en ocajion de la radunanza generèla de l’Union di Ladins. Duc i sozi e i aboné a La Usc ciaparà en don l Almanach.
La soracuerta del Almanach 2021.
La radunanza sarà viventèda da vèlch ciantia del Cor Valfassa.
N Almanach pizochent che ge dèsc gran lèrga a la femenes
La é stata dalbon trefèda l’idea che a viventèr chesta publicazion sie la patofies del artist da Cianacei Manuel Riz. Te chisc egn, con sie eie ironich e pizochent, l à metù ensema ben 120 dessegnes che depenc a na vida ponghenta e sarcastica la jent, i fac, i momenc più segnificatives de ogne meis del an. La patofies de Manuel Riz l é doventà l apuntament stabol e spetà de ogne edizion del Almanach, no demò percheche i letores é curiousc de veder sia caricatura, o chela del ombolt de sie paisc, o del comandant di Studafech, o chela del vejin de cèsa, ma percheche l lapisc de Manuel é bon de interpretèr col grignot e la lijiereza ence i momenc più grieves. E ben segur no l é stat semper sorì, no semper la situazion engaissèa la caricatura del event, del moment, de la storia, ma Manuel é semper stat a l’auteza de sia encèria.
Ma l’Almanach no é fat demò de la patofies de Manuel Riz. I é n muie e de enteres i contegnui che l grop de redazion met ensema. Te duc chisc 10 egn l é semper stat ence la Piroles endrezèdes da la redadores de La Usc de Fascia che met dant en curt i fac da recordèr e na curta biografia de persones ladines che no les é più anter la comunanza ma che à lascià pedies fones da no desmentièr.
Te chisc egn l é stat recordà persones de nonzech tel ciamp de la cultura, de la letradura, de la musega, del sport, de la religion ma ence persones manco cognosciudes che te sie sconet se à dat ju per la crescimonia de sia jent con fèr umol e zenza recognosciment ofizièi. L é soradut chesta la persones de noscia Tera Ladina che aon volù meter al luster sul Almanach.
E chest’outa, per festejèr coche carenea i 10 egn, troa gran lèrga ence la femenes, eles te la storia de la Ladinia. No podaane no ge resservèr na lèrga spezièla sun chest numer spezièl a cheles che de spes se à desmentià, se à lascià fora, se à lascià te n cianton. Gran merit donca ence a la femenes!
12 depenc a èga de nesc crepes compagné da 12 lejendes ladines da poder scutèr
Un di depenc di crepes dessegné da Fernando Brunel che fornesc l nef numer.
Na edizion torona meritèa n contegnù da festa. Te chesta neva edizion troa lèrga ence 12 depenc a èga, un per ogne meis, de n auter artist fascian de nonzech, Fernando Brunel, president de l’Union di Ladins de Fascia. Per chest numer l à depent 12 crepes ladines con colores vives e gaerc che fèsc amò più riches i sfoes del Almanach. E apede, e chesta l é stat na idea de la vulcanica vizepresidenta Nicoletta Riz, l é stat metù ence n QR code con chel che se pel scutèr per ogne meis na lejenda ladina che passenèa col crep, leta ju da letores de duta cantes la valèdes ladines. Na vida per ge dèr valuta al contèr a ousc, na tradizion de nesc veies che i neves sistemes de comunicazion à fat mingol jir do brea ju.
La grafica é stata rencurèda ence chest’outa da Stephanie Ghetta.
Donca ve speton en domenia ai 13 de mèrz da les 17:00 a Poza. No ve desmentià l couribocia FFP2 e la curiosità per l nef Almanach 2021.
Monica Cigolla