N pensier dal cher a noscia jent

Un di obietives de maor emportanza de la sociazion l é slarièr fora l lengaz e la cultura ladina. Chest an en colaborazion con tropes realtà de Val l à dat fora sacotanta publicazions endrezèdes ti egn passé. L é stat l’ocajion per ge dèr luster ai lurieres de enrescida e de produzion editoriala che la sociazion à rencurà.

A nesc giaves

N pensier dal cher l é stat pissà dantdaldut per noscia jent de età. Te duc i paijes de val l é jà stat dat fora o vegnarà portà per Nadèl na publicazion, ensema ai dons che vegn jà enjignà ogne an.

L é stat cernù fora ‘Mie istà sun Tamion’ de Fernando Brunel e ‘Na gejia e n pugn de ciase’ de Maria Lorenz Detomas de Vian e ence l numer trei de ‘A Spas per la Ladinia’. La speranza l é che chisc libres posse compagnèr i letores ai recorc del passà o te n viac stroz per nosc raion dolomitan a la descorida de lesc, curiositèdes e stories de persones e families. Speron de cher sie n compagn sinzier, che l deide a passèr n Nadèl en serenità e con legreza.

No se pel pissèr a la gran robes, ma a la robes giustes. Simon de Giulio

Per i paijes de Cianacei, Gries, Dèlba e Penìa la sociazion rengrazia de cher l Club Pietrone, a Ciampedel l grop de volontariat de la parochia, a Mazin, Ciampestrin e Fontanac l Comun de Mazin e l Comitat evenc, a Sèn Jan l’Aministrazion de Comun, a Soraga l Grop di joegn e a Moena l Zircol de la jent de età. L’Union di Ladins de Fascia ve disc amò n develpai de cher per chel che aede fat, e che amò fajede, per noscia comunanza.

Ai studenc de ogne età

Inant Nadèl, desche l an passà, l’Union di Ladins jirà te la pruma populères de la Scola de Fascia a ge sporjer ai picoi scolees l liber ‘Mia pruma paroles’, na publicazion nasciuda da n projet interladin che te Fascia era stat tout su con gaissa da noscia sociazion dessema col medemo istitut de formazion.

Ti meisc che vegn l é en program la distribuzion te la classes quarta e quinta di licees de la riedizion de ‘Dò l troi de la speranza’, na regoeta de lurieres poetics de Valentino dell’Antonio (Tinoto Monech) da Moena. L liber vegnarà dat fora en ocajion del 40° aniversarie da la mort del autor, stata ai 10 de firé del 1982 e l vegnarà prejentà dal dr. Fabio Chiocchetti che à rencurà l’opera.

Tel meis de mèrz enveze vegnarà portà te la classes pruma e seconda di licees l roman ‘M.J. Viver al temp del malac’, n projet nasciù dal joen da Cianacei Daniele Verra, che l portarà dant n intervent de prejentazion.

A n ladin ge sà bel rejonèr, lejer e emparèr te sie lengaz

Per chel che revèrda l mond de la scola no l é pa fenì dut chiò! L president Fernando Brunel ai 17 de dezember l ge portarà dant ai studenc de l’Università de la Terza età na lezion storica su la veres de liberazion e su la fegura de Andreas Hofer. A duc i studenc ge vegnarà dat fora te chesta ocajion l liber ‘I Fascegn a le vere de liberazion 1796-1813’ de Hugo de Rossi, publicà del 2009 da Istitut Cultural, Union di Ladins e Schützen de Fascia.

L é stat dat fora desvaliva publicazions a noscia jent.

A nesc bec

Con la preziousa colaborazion de don Mario Bravin e de don Andrea Malfatti ai bec de noscia Val che chest an à fat la Pruma Comunion ge é stat dat fora l liber de la orazions per bec ispirèdes ai Salmes ‘Te ciante mia legreza’, na regoeta lurèda fora da Monica Cigolla con i dessegnes de Maria Pezzedi e publichèda con la Comiscion per la cultura de la parochies de Fascia. L é n picol libret che ge dèsc l met a picoi e gregn de preèr e se oujer al Segnoredie tras l son douc e delicat de nosc lengaz de la mère.

Nicoletta Riz, Vizepresidenta Union di Ladins de Fascia