L Grop Ladin va inant con gaissa
No aessa nience servì ge l domanar a la jent te sala de Oratorio de Moena se i volea che l Grop Ladin vae inant e che l boletin Nosha Jent l seghite a vegnir publicà. La prejenza e la vejinanza desmostrada te chesta ocajion dajea da entener jà la resposta.
En domenia ai 7 de november l Grop Ladin à chiamà ite la radunanza di sozi per dezider ensema l davegnir del grop e per l renovament del diretif.
Laorar ensema porta bogn fruc
Ence l Grop Ladin, desche n muie de sociazion che va inant demò de gra al volontariat, l’à abù auc e basc. »Jà del 2014 la presidenta de enlaoita Maura Chiocchetti – à dit la presidenta di ultimes egn Angela Chiocchetti te soa relazion – la scriveva che se passava n moment senester a cauja che la jent la fajeva fadìa a se dar jù, che menciava stimoi e soraldut no l’era n recambie generazional. Enlaoita l’era vegnù fora da man de la radunanza inomes de jovegn e jovene motivade a dar n contribut per jir inavant: ereane pontè via con gran gaissa e vöa de far. Ma come de spes pol sozeder, la vita la porta a cerner strade desvalive, e dachelanvìa, la desponibilità la é jita a se perder. Aon abù momenc che se fajea fadìa ence demò a se binar, fegurave a endrezar scomenzadive, enscinamai a meter ensema i 4 numeres del boletin e l dar fora respetan i tempes emprometui l’é stat senester. Se aon ascort che aldidancö ge völ competenze e abilità tecnologiche per star al pas coi tempes, ge völ desponibilità mirade per se tor su enciarie de manovalanza, ma ence a pensar a idee e proponete che, do le aer condividude, se pode le portar a compiment. Jà da n trat la gestion aministrativa é passada al personal de l’Union di Ladins de Faascia, de chela che l grop l’é na sezion, e te chest an 2021 ence l’enciaria e la gestion de duc i abonamenc de Nosha Jent, dal moment che jà da n pez la se cruziaa de manar demez chi che va fora de paes.«
Ma no l’é stat dut neigher. »Te chisc egn aon podù veder come che porta bogn fruc laorar ensema – à amò dit la presidenta – condivider projec e esser a una con le motivazion e i obietives. Le publicazion e le scomenzadive che aon fat ultimamenter ensema a l’Union di ladins, l Comun de Moena, l’Istitut Ladin e la Cassa de Sparagn, ne à permetù de ge sporjer a la jent libres de gran valuta per i contegnui e per noscia storia, come la ristampa del liber de poesie del Tinoto Monech, l gran laoro de promozion soziala del Zerilo Bora e siöi studenc, l’enrescida de le musiche del Canori registrade e date fora te n CD. Aon podù endrezar conzerc, momenc de entrategniment e prejentazion de libres e fat cognoscer, con scontrade a tem, persone de gran spessor cultural che aveane l dover de recordar come l maestro Simonin Maza e la maestra Valeria. Ma l Grop Ladin da Moena no l pol star en pe da sol!« à serà sù Angela.
Per chest l’à volù ge sporjer l rengraziament a duc chi che se à dat ju te chisc egn: a la direzion del Grop e a la redazion de Nosha Jent, a chi che à scrit e a chi che à portà fora i boletins, ai sostegnidores e a chi che à sapù aprijiar chel che l’é stat fat a duc chi che ge é stat apede.
»No lascià seciar vosce raisc« l é parole del Pelegrin Chiocchetti Pelin, che la presidenta Angela à uzà fora proprio per recordar chela jent che te chisc egn ge é stata apede al grop. L é stat nominà la Silvia Zenti, l Bepi Tasin e la Carla Zenti Galbusera, se n jita da pech.
Vejinanza e aprijiament al lurier del Grop
Na vejinanza e n aprijiament che ge é stat palesà al Grop Ladin ence tras desvalives entervenc: de la vize ombolta de Moena Cristina Donei, de la presidenta del Istitut Cultural Ladin Lara Battisti, de la presidenta de la Union Generela di Ladins dla Dolomites Milva Mussner che à manà n messaje, del president de l’Union di Ladins de Fascia Fernando Brunel, del president onorarie Antone Polam e de Annalisa Zorzi. Desvalives intervenc à sotrissà l’emportanza di pionieres del Grop da Moena per tegnir sù la ladinità de duta Fascia e la Ladinia e l besegn de jir inant adum, sorafora i ciampanii.
»L Grop Ladin l’à na gran storia de valores e de jent – à dit Fernando Brunel – cognon vardar che l vae inant e l didar, che no vae perdù chesta gran richeza.«
Na patrimonie cultural e linguistich che no pel restar te crigna
N patrimonie prezious de documenc e scric che Fabio Chiocchetti é dò che l regoi e l met en orden per dapò i digitalisar e i meter online a la leta de duc. »Tel jir a vardar fora i documenc – l’à dit Fabio – è troà le testimonianze scrite de nösc velges. Jà del 1971 i volea lasciar sù de meter ensema l boletin. L’é giusta passà 50 egn che sion chigiò che se meton dant la medema domana. Che dijessei a veder chesta sala piena de jent, a saer che aldidancö no l’é problemes de scioldi, che l’é tipografie che stampa a colores en prescia e con pöcia spesa? Te le piate de Nosha Jent l’é n patrimonie cultural e linguistich che l’é n pecià che l reste te crigna, l’é na sorpresa una tacada te l’autra, de parole, conzec, esprescion. L’endesfida del nef diretif sarà chela de soscedar n nef enteres cultural e de seghitar a portar inant chesta gran arpejon.« N auter lurier che l’é dà a far Fabio Chiocchetti l’é chel per regoer le poesie de don Bruno Daprà te na publicazion che vegnarà data fora a duc i sozi.
L nef diretif
L’é stat dapò l moment de la litazion. En dut à lità 42 persone e tel nef diretif l’é ruà ite Angela Chiocchetti, Alberto Chiocchetti, Maura Chiocchetti, Marilena Donei, Elisa Zanon, Elisabetta Ganz, Daniela Chiocchetti, Maria Teresa Böttcher e Bruna Chiocchetti. Apede a cheste persone n sarà de autre che à dat la desponibilità a dar na man, desche i conseieres da Moena de l’Union Barbara Bonu, Fabio Chiocchetti e Andrea Zanoner, e amò Monica Lorenz, Patrizia Vadagnini e de autres, che podarà dar na man ence te la redazion del boletin Nosha Jent. La radunanza se à serà sù con n bel moment algegher coi joenec del grop Circensema che i à moscià soa braura con balote, monozicles, corde e autres argagnes e a la fin i à slarià fora sun paladina ence la bandiera ladina, se vadagnan n gran batiman da duta la jent de sala.
