»I colores del temp« ne cianta la beleza

Parole de speranza e de fe, parole che vel ne far veder e recordar la beleza de la vita, del ambient, del amor, na beleza che la é de ogne età e che, descheche à dit i savies, la podarà salvar l mond. L é chest l messaje che don Bruno Daprà da Moena, 80 egn compii da pech, à volù ge portar a la jent, presciapech na sessantina de persone, che en domenia ai 9 de jené se à binà te gejia de Sèn Vile per la prejentazion del nef liber »I colores del temp« dal fora dal Grop Ladin da Moena con l’Union di Ladins, che regoi passa 200 pensieres, recorc e reflescion de don Bruno.

Na gran produzion, en gran part per ladin – à dit Fabio Chiocchetti del Goti, che à rencurà l’edizion – che la ne moscia che no l é demò dut bel e bon, ma ampò la auza fora soraldut i aspec positives.

Don Bruno con Fabio Chiocchetti endana la prejentazion.

Scric che doventa amò più preziousc te chisc tempes grieves – à dit la presidenta del Grop Ladin Angela Chiocchetti – e che spere che i posse ge dar a chi che lec mingol de speranza per l davegnir.

Don Bruno, che l à semper dit de no se conscidrar n poet, l à rengrazià Fabio e Angela per ge aer dat l stimol a publicar, a se far spervajo che scriver e serar te na crigna no serf a nia.  

Duc dant o dapò aon metù per scrit valch pensier – à dit amò Angela – ma de spes stenton a se lasciar fora, a mosciar nösc sentimenc e nosce deboleze, ence se chest l ne aida a crescer.

Per chest i doi frades del Goti i à rengrazià don Bruno per aer permetù la publicazion de cheste poejie, n patrimonie vegnù al luster canche n é stat publicà una o doi sun Nosha Jent, e che à fat descorir  beleche adinfal la rica produzion e che à ence l valor en più de didar a far crescer la letradura ladina. A lejer chisc pensieres ladins zachei de autres podessa vegnir engaissé a scriver valch tel lengaz de la mare e se lasciar ispirar, descheche don Bruno enstes à tout ispirazion da autres poec, tant ladins che taliegn.

L quartet »Demò Ousc«, con la presidenta del Grop Ladin Angela Chiocchetti, à viventà l domesdì.

»I colores del temp« pea via dai recorc de joentù e l ne rejona de la »prejenza più auta« che se moscia te la natura, tel creat, te dute la sfumadure de colores che porta na vijion a 360 ° de la esperienza umana de chest »ciantor de la beleza«.

La prejentazion é stata viventada da la letura de valch poejia touta fora dal liber e dal bel compagnament del quartet Demò Ousc, che à portà dant valch ciantia ladina n muie aprijiada.

L liber vegn prejentà ence a Pera, tel paisc olache don Bruno l é stat per n mie de egn, en domenia ai 16 de jené da le 4 domesdì te gejia e l ge vegn dat fora en don a duc i aboné al boletin »Nosha Jent«.

Lucia Gross