N conzert ladin da marevea per Tita Batistoun

No podea esser na idea più bela per ge recordèr a la jent de Soraga e de Fascia n artist, n zipiador de gran valuta se n jit acà 30 egn: Tita Pederiva Batistoun (1905-1992). L’Union di Ladins de Fascia à volù l onorèr con n conzert maraveous, chiaman per la pruma outa te Fascia doi artistes ladines de livel internazionèl. Si riches curricula é stac porté dant su la paladina de La Gran Ciasa a Soraga da Monica Cigolla, do l salut de l’assessora a la cultura del Comun de Soraga Sandra Bussolon, che à sport sia colaborazion per chest event.

Martina Rifesser e Sabina Willeit endèna l conzert.

Sabina Willeit, mezsopran da Selva de Gherdena, l’à interpretà passa 25 pèrts te operes liriches che va dal classizism a la musega moderna, l’à lurà con regisć de nonzech e diretores de prestije internazionèl e la cianta regolamenter con l’orchestra da solista e te conzerc desche ciantarina de Lieder. Sot la bacheta de la diretora d’orchesta Speranza Scappucci tel teater de Liegi tel Belge l’à ciantà la Messa de Requiem de Verdi e la pèrt de Suzuki te la Madama Butterfly de Puccini.

Martina Rifesser la é da Ortijei, la vif da passa 20 egn te l’Austria. L’à sonà per 18 egn alalongia te la cognosciuda Brucknerorchester, la é stata solista tel conzert per Michael Gorbatschow e te chel per i 200 egn de la Bandiera talièna con Mirella Freni e Andrea Bocelli sot la direzion de Claudio Abbado.

A Soraga la doi artistes no les à demò ciantà e sonà a na vida maraveousa, ma les à ence compagnà l publich che empienia la sala, prejentan per ladin a na vida dassen gustegola e enteressanta i autores e i toc de sie program, che é jit en orden cronologich da Mozart a Beethoven, da Rossini a Schubert, per ruèr a Mascagni e Puccini. I toc demò per èrpa l é stat l’ocajion per saer vèlch de più da Martina Rifesser de chest strument beliscim e pech cognosciù.

Anterite l president de l’Union di Ladins de Fascia Fernando Brunel à prejentà la fegura de Tita Pederiva, la vita de chest zipiador rich de èrt e puret de paroles, che fajea statues de legn che parea de bron, con recorc personai che é ruè ence da la paroles del president de onor Antone Pollam.

L rengraziament final de l’Union di Ladins de Fascia.

L final del conzert l é stat na bela marevea per i fascegn, ajache la doi artistes de Gherdena à volù per l’ocajion portèr dant trei toc del componist Luigi Canori: Ciant de l’aisciuda, Nina Nana e Santina, che à soscedà l gran batiman del publich. L bis, con Ladinia Patria mia, musega de Giorgio Fasciolo su paroles de Carlo Willeit, l é stat la ocajion per recordèr l stimà e benvolù militant ladin, père de Sabina, che ne à lascià apontin acà n an.

Con n maz de fiores e amò n gran batiman i fascegn à saludà e rengrazià la doi artistes, che ne à fat dalbon n gran cher.

Lucia Gross