L é a la leta de duc l patrimonie culturèl de Luigi Canori

En domenia ai 3 de oril, da les 4 domarena, te oratorie de Moena, sarà n event emportant per la cultura de Fascia: vegnarà portà dant na neva publicazion, de passa 400 piates, data fora en coedizion da l’Union di Ladins de Fascia - Grop Ladin da Moena e dal Istitut Cultural Ladin ”Majon di Fascegn”.

L liber “Canori. Scric, poesìe e cianzon” met a la leta gran pèrt de l’opera leterèra e linguistica del ecletich autor da Moena, portan a compiment n lurier de regoeta envià via da Fabio Chiocchetti del Goti amò ti egn ’80.

I componimenc de musega e i dessegnes e retrac del Canori (inom d’èrt de Ermanno Zanoner del Gabana, 1907-1991) i é jà stac valorisé ti egn dal Istitut Cultural Ladin tres la publicazion de libres, la realisazion de mostres e de spetacoi, la elaborazion e la registrazion de cianties. Ma l lurier sui scric l é stat portà a piz demò ades, col contribut del archivist Federico Zanoner (nez del Canori), che l à binà ensema ti egn sacotenc de tesć e documenc, scric en prosa, rimes, aforismes e pensieres de gran valuta e emportanza per l lengaz e per la cultura ladina, per na pèrt jà en deposit ti Archivies del Istitut Cultural Ladin. Ades chest patrimonie doventa n don per duta la jent de gra la neva publicazion rencurèda da Fabio Chiocchetti.

L liber vegnarà prejentà co la moderazion de la giornalista Anna Mazzel, te n dialogh anter Chiocchetti e Zanoner su l’opera del gran autor fascian.

Te chesta ocajion sarà da scutèr la ousc del Canori te vèlch registrazion de programes radio, che sia sor Veronica Zanoner Piccoliori à metù a la leta del Istitut per la digitalisazion e archiviazion.Chisc audio sarà ence publiché sul sit de l’Union di Ladins e su la Mediateca del Istitut Cultural, da poder ite tras QR code stampà sul segnaliber dat fora co la publicazion. L’opera ge vegnarà sporta debant a duc chi che tolarà pèrt a la prejentazion.