Cronaca, storia, sport, recorc e curiositèdes de ‘Nosha Jent’

L é l bel vis grignolent de Caterina Ganz, la joena atleta de paslonch jita ai Jeghes olimpics de Beijing, a saludèr i letores da la soracuerta del ultim numer de Nosha Jent.

Chest boletin, fat da na redazion de volontères metuda ensema dal Grop Ladin da Moena, l compagna oramai da beleche 60 egn soraldut i moenac, chi che stèsc te paisc e chi a la foresta, con cater numeres fora via per l an che la jent speta con gust. L é n codejel che met dant vèlch informazion, ence se no leèda a l’atualità strenta ajache l vegn fora vigni 3 meisc, ma che soraldut per chi che stèsc fora de val pel esser ampò neva, e etres scric de desvaliva sort.

Sul prum numer de chest an 2022, apede a la ousc de la joena olimpionica, troon contribuc che revèrda ambient e sozietà, l record de la Carla del Zenti se n jita l an passà, vèlch curiosità leèda al lengaz e la cultura ladina, e amò jeghes desche l lech da endoinèr e l schem de paroles encrojèdes.

Do l renovament del diretif del Grop Ladin d’uton del an passà, l é stat vardà de tor ite ence jent joena e de se slarièr semper de più ence sorafora l paisc de Moena, te duta Fascia.

Sun chest numer troon donca ence l contribut de la joena Elisa Zanon Bora che ne rejona de èrt e chel sui molins de Luca Zacchia de Sas, che ensema col scrit sul liber »I colores del temp« de don Bruno Daprà, dat fora dal Grop e prejentà te duta la val, l renforza l leam anter Moena e Fascia.

L Molin de Sas e l ensomech de Luca

Luca Zacchia de Sas l é n joen da Poza de nience 20 egn pascionà de storia e de tradizions de noscia val. Chi che é più atives sui social fazile i à abù ocajion de se embater te si scric che rejona de veies frabicac, de si giaves e besaves, de cultura e vita da n’outa, canche fosc – l disc - »la jent tegnia più ensema e la era bona de se la far ca ence ti momenc più senestres«.

Luca Zacchia dedant al Molin de Sas sa Meida.

L enteres per chisc argomenc da man de Luca, che l fèsc l camerier e l monech e l à ence la pascion per l sgol, é nasciù da n veie frabicat de familia, l Molin de Sas de Meida. Da 70 egn chest molin no majena più, la rodes é states toutes demez del 1952 ma l frabicat, enceben desmetù te sia funzion, l é restà coche l era, fin ades l se à salvà dal destin de la maor pèrt de cèses e tobié de noscia val che oramai ge à lascià l post a cartieres per foresć.

Sun »Nosha Jent« Luca ne rejona apontin de chest molin e de sia storia. El te chisc egn l é jit a veder e l se à informà su la carateristiches ence tecniches di veies molins atives stroz, e ence de bièva e farines, semper col ensomech che chest patrimonie de sia familia che é stat desmetù posse endò ciapèr vita e l Molin de Sas sa Meida posse endò tachèr a majenèr.

L boletin Nosha Jent ge vegn dat a duc i aboné e sozi de l’Union di Ladins de Fascia che à enteres a l aer. I pel jir a se l tor te la Senta de l’Union di Ladins de Fascia a Sèn Jan o domanèr per mail o per telefon (union@ladinsdefascia.it; 0462 764545) de se l fèr manèr en format pdf. LG