»Fascegn« a Cianacei
En colaborazion col Comun de Cianacei l é stat metù fora lo dal infopoint tedant al Chino Marmolèda doi tabeles permanentes con na selezion de retrac dal liber »Fascegn. Retrac de jent da zacan«.
Una de la doi tabeles metudes fora a Cianacei.
L’aministrazion jà l an passà l’aea tout ite noscia sociazion per viventèr chest cianton de paisc con curiositèdes e poejies che ge jia do al meis con apede i retrac dai archivies del Istitut Cultural e no demò. Chesta doi neva tabeles, con la grafica de Giuditta Soraperra, les porta dant apontin na selezion de 12 momenc de comunanza tel jir di egn, da la tradizion di conscric, ai bec de la pruma Comunion, a la squadra de hockey del 1975/76.
Chisc retrac i é stac fac a Cianacei, Gries, Dèlba e Penìa, e no demò: per i cerner fora l é stat vardà de corir duta la frazions. La didascalies per ladin é states trasletèdes ence per talian e per ingleis da Alice Deflorian coscita da poder tor ite e encuriosir ence nesc ghesć che passa lo tedant. L prum retrat che se pel troèr l é stat fat te Contrin del 1938 e l tol ju Tita Giat e Tone de Lucol che i porta ju te paisc con la lesa na femena che se à fat mèl a la giama.
L liber »Fascegn«, rencurà da Nicoletta Riz e prejentà chest an tel chèder de l’Aisciuda Ladina, l tol ite passa 250 retrac da zacan biné su da la redazion fascèna de La Usc di Ladins. Per da Nadèl l é segur n bel don da fèr e podede l troèr a priesc rebassà te noscia senta a Sèn Jan, visavì l Hotel Dolomiti.
La Usc 47 del 2022