L’Union di Ladins de Fascia va inant col projet “Saeres. Tutorials de tradizions e mestieres fascegn”

“Depenjer a la fascèna” l é stat un di tutorial de SAERES più aprijié.

N projet de gran valuta tant dal pont de veduda storich-etnografich che sozièl. Se trata de na lingia de filmac curc e scempies che à l zil de tegnir vif la particolaritèdes de noscia cultura e vita da

vigni dì. Ben segur l é na modalità neva e inovativa de slarièr fora tradizions e cultura.

Che él n Saer?

“Saon che l é n muie de Saeres amò te crigna, che semper manco persones cognosc. L é proprio n pecià che no i vegne porté dant a de autra jent. Aldidanché una de la vides per ruèr più apede a la jent l é segur i social e se aon pissà de durèr l format del tutorial per poder regoer chisc Saeres, che l é l resultat de n prozes de perfezionament che nesc crosaves à perfezionà tel jir di centenees”

L projet vel esser n strument che ferme tel temp chel che ades amò saon, che no vegne perdù fora i saeres de la memoria storica de noscia comunanzes. I tutorials i é gustegoi e lijieres da ge vardèr, enjigné en colaborazion con esperc del setor, da troèr sul canal youtube de TV Ladina.