Na mostra e n liber per Tita Pederiva

L’Union di Ladins de Fascia ge fèsc onor al scultor da Soraga Tita Pederiva Bastiston, a 30 egn da sia mort, con na mostra e na publicazion de sia operes. Na scomenzadiva voluda e portèda dant con gaissa e determinazion dal president Fernando Brunel, col sostegn de dut l Consei e del Comun de Soraga.

Te La Gran Ciasa vegnarà metù fora na selezion de sia scultures e dessegnes dac adimprest da tropa jent privata e istituzions de Fascia e apede l é stat enjignà ence na publicazion con retrac e testimonianzes che documentea no demò l percors del artist, ma en particolèr l om e sie esser più intim, più privat.

Tita Pederiva Batiston à lascià n gran patrimonie artistich no demò a Soraga ma te duta la val e ence foravia e chesta mostra e l liber dèsc l’ocajion per l cognoscer e l valorisèr amò de più.

La mostra vegn inaudèda en sabeda ai 19 de november a La Gran Ciasa da les cater domesdì, te chesta ocajion vegn ence prejentà la neva publicazion. La operes de Tita Pederiva sarà da poder veder enscin ai 4 de dezember da les 16.00 a les 19.00.

La Usc 44 del 2022