La tradizion di “Conscric” con l’Union di Ladins de Fascia

L’Union di Ladins de Fascia, ensema al Pian Joegn ‘La Risola’, porta dant na neva scomenzadiva, l projet ‘Conscric’, che nasc da la volontà de conservèr na tradizion amò prejenta e viva ti joegn de Fascia.

Na tradizion leèda ai ric del passaje de la persona da bez a gran, carateristics tant dal pont de veduda antropologich che sozièl, fac da elemenc tramané de generazion en generazion e etres che se à renovà e svilupà tel temp.

L projet vel fèr ge cognoscer ai joegn del 2006 e del 2007 chisc ric e la tecniches per poder realisèr enstesc i elemenc più emportanc: l ciapel e l gramièl personalisé, che i vegn tiré ite tel an e do conservé per recordèr chest moment de valuta; amò apede fac da ic i tol su ben segur n valor enjontà.

Via per d’uton vegnarà metù a jir n laboratorie artistich – creatif olache touses e fenc podarà emparèr a fornir su l ciapel con fiores e vetes aldò de la tradizion e ence a decorèr l gramièl brun, element più vejn tel temp ma che oramai l fèsc pèrt de la tradizion. I materièi vegn metui a la leta da la sociazion.

Conscric del 1910 da Mazin. Retrat de Ida Endrich da “Fascegn. Retrac de jent da zacan”

L é pervedù 5/6 scontrèdes da sera, bonamenter de otober e november, che sarà na ocajion de confront anter i conscric de duta la val.

La scomenzadiva sarà compagnèda da n enteressant projet de musega portà dant da n joen dj fascian, DJ Sem, che per l’ocajion l à lurà fora en chief moderna toc de musega tradizionèla cianté e registré ensema a vèlch tous endèna l’aisciuda e l istà.

Per aer maor informazions se pel chiamèr l’Union al numer 0462/764545, chi che vel se enscinuèr i pel manèr n messaje whatsapp al medemo numer.